ՌԴ նախագահն ու Հնդկաստանի վարչապետը հեռախոսազրույց են ունեցել․ քննարկել են նաև BRICS-ի ընդլայնումը

Ռոսաստանի նախագահ Վլադիմիր Պուտինն ու Հնդկաստանի վարչապետ Նարենդրա Մոդին հեռախոսազրույց են ունեցել։

«Քննարկվել են Յոհանեսբուրգում կայացած BRICS XV գագաթնաժողովի արդյունքները։ Ընդգծվել է ձեռք բերված պայմանավորվածությունների նշանակությունը, առաջին հերթին, BRICS-ի ընդլայնումը, որն անկասկած կնպաստի միջազգային գործերում ասոցիացիայի ազդեցության մեծացմանը»,- հայտնել է ՌԴ նախագահի պաշտոնական կայքը։

Պայմանավորվածություն է ձեռք բերվել սերտ համագործակցության մասին՝ Ռուսաստանի BRICS-ի նախագահության համատեքստում, որը կսկսվի 2024 թվականի հունվարի 1-ից։ Մտքերի փոխանակում է տեղի ունեցել նաև Նյու Դելիում կայանալիք G20 գագաթնաժողովի կապակցությամբ։

«Դիտարկվել են ռուս-հնդկական հարաբերությունների արդիական հարցերը, որոնք աստիճանաբար զարգանում են առանձնապես արտոնյալ ռազմավարական գործընկերության ոգով։ Նշվել է առևտրատնտեսական համագործակցության դրական դինամիկան։ Արտահայտվել է փոխադարձ տրամադրվածություն էներգետիկայի ոլորտում լայնածավալ նախագծերի հետևողական իրականացման և միջազգային տրանսպորտային և լոգիստիկ ենթակառուցվածքների ընդլայնման ուղղությամբ համատեղ աշխատանքի համար»,- ասվում է հաղորդագրության մեջ։