ԱՄՆ 16-րդ նախագահ Աբրահամ Լինքոլնի նամակը կվաճառվի 85 հազար դոլարով

Փենսիլվանիայում հայտնաբերվել եւ վաճառքի է հանվել Աբրահամ Լինքոլնի մինչ այդ չհրապարակված նամակը, որը նա գրել է քաղաքացիական պատերազմի ժամանակ, տեղեկացրել է The Guardian-ը։

Կարճ նամակի հասցեատերը Չառլզ Էլեթ-կրտսերն էր, որը հետագայում դարձել է Միության բանակի գնդապետ։ Նա Լինքոլնին նամակ էր գրել քաղաքացիական ինժեներների լավ ֆինանսավորվող կորպուս ստեղծելու խնդրանքով։ 1861թ. օգոստոսի 19-ին գրված նամակը պահվել է ավելի քան 100 տարի մասնավոր հավաքածուում։

«Աբրահամ Լինքոլնի չհրապարակված նամակների հայտնաբերումը ավելի հազվադեպ է դառնում»,- նշվել է Նաթան Ռաաբի՝ Ռաաբի հավաքածուի տնօրենի հայտարարությունում։ Կազմակերպությունը կզբաղվի նամակի վաճառքով, որը գնահատվում է 85 հազար դոլար։

«[Նրա] ինքնագրերը եւ պատմական փաստաթղթերը միշտ մեծ պահանջարկ են վայելում։ Նրա նամակը հայտնի է իր պարզությամբ եւ համառոտությամբ։ Նա երբեք երկու բառ չի գրի այնտեղ, որտեղ մեկն էլ բավական է»,- նշել է Ռաաբը։