Տամբովի վառոդի գործարանում պայթյուն է տեղի ունեցել. զոհվել է 4 մարդ

Այսօր Տամբովի վառոդի գործարանում տեղի է ունեցել պայթյուն՝ դրան հաջորդող հրդեհով։ Այս մասին իր Թելեգրամ-ալիքում տեղեկացրել է Տամբովի նահանգապետ Մաքսիմ Եգորովը։

Նահանգապետի խոսքով՝ ինքն ընդհատել է աշխատանքային այցը մարզի շրջաններում եւ օպերատիվ կերպով եկել է դեպքի վայր։

«Հրդեհի պատճառը մարդկային գործոնն է։ Միանշանակ հայտարարում եմ՝ սա ահաբեկչություն չէ։

Ցավոք, կան զոհեր։ Ողջ անհրաժեշտ օգնությունը տուժածներին կցուցաբերվի»,- նշել է Եգորովը։

Ինչպես նշել է նահանգապետը, ժամը 14.10-ին Ռուսաստանի ԱԻՆ Տամբովի մարզի ճգնաժամային իրավիճակների վարչության կենտրոնի օպերատիվ հերթափոխը տեղեկություն է ստացել Տամբովի վառոդի գործարանում ճայթյունի մասին, որին հաջորդել է հրդեհը։ Հրդեհի մակերեսը 1 քառակուսի մետր է, ժամը 14.17-ին հրդեհը մարվել է։ Կան տուժածներ։ Տեղում աշխատում են 4 հրշեջ հաշվարկ, 16 մարդ, Գլխավոր վարչության օպերատիվ խումբը։

«Գործարանի աշխատողներին եւ հարեւան բնակավայրերի բնակիչներին ոչինչ չի սպառնում։ Ձեռնարկությունն աշխատում է հաստիքային ռեժիմով, տեխնոլոգիական շրջափուլը չի խախտվել, արտադրությունը չի կանգնեցվել»,- ավելացրել է Եգորովը։