Սան Ֆրանցիսկոյի օդանավակայանն աշխատանքի է ընդունել 14 տարեկան կատվին

Սան Ֆրանցիսկոյի օդանավակայանում 14 տարեկան կատուն միացել է կենդանիների թերապեւտիկ թիմին, հայտնում է NY Post-ը:

Դյուկ Էլինգթոն Մորիս անունով սեւ-սպիտակ կատուն կօգնի օդանավակայանի այցելուներին ազատվել թռիչքների հետ կապված սթրեսից: Դյուկը դարձել է կատվազգիների ընտանիքի առաջին ներկայացուցիչը օդանավակայանի թերապեւտիկ թիմում, որտեղ արդեն աշխատում են Լիլու անունով խոզը եւ Ալեքս Մեծ անունով նապաստակը:

14 տարեկան կատուն ժամանակին անտուն է եղել. փրկարարները նրան սոված են գտել Սան Ֆրանցիսկոյի փողոցում եւ ուղարկել կենդանիների ապաստարան: Այնտեղ նրա վրա ուշադրություն է դարձրել 5-ամյա աղջիկը, որը ծնողներին համոզել է կատվին տուն տանել։ Կենդանուն անվանել են ի պատիվ ջազ երաժիշտ Դյուկ Էլինգթոնի։ Նոր տերերը տպավորված էին կատվի հանգիստ եւ ընկերասեր բնավորությամբ եւ նրան հավաստագրել են որպես «կենդանիների թերապեւտ»։ Տասը տարի Դյուկը աշխատել է որպես կենդանիների թերապեւտ ՝ այցելելով հիվանդներին քաղաքի հիվանդանոցներում՝ դժվար ժամանակաշրջանում նրանց մխիթարելու համար: