Հովիկ Աղազարյանն անշնորհքի պես մեջ ընկավ․Մենակ դա էր պակաս, որ դա կարողանար հայհոյել . Արթուր Խաչատրյան

Հովիկ Աղազարյանն անշնորհքի պես մեջ ընկավ․ իրենց անդաստիարակ պահվածքն է: Այս մասին այսօր՝ մայիսի 24-ին, ԱԺ-ում լրագրողների հետ զրույցում նշեց «Հայաստան» խմբակցության պատգամավոր Արթուր Խաչատրյանը՝ անդրադառնալով ԱԺ դահլիճում տեղի ունեցած միջադեպին:

Ընդդիմադիր պատգամավոր Արթուր Սարգսյանից լրագրողները հետաքրքրվեցին, թե իրեն ինչ է ասել ՔՊ-ական Հովիկ Աղազարյանը. «Հովիկ Աղազարյանն ինձ բան չի կարող ասել: Հովիկ Աղազարյանն անշնորհքի պես մեջ ընկավ: Դա իրենց անդաստիարակ պահվածքն է: Էդ պահվածքի պատճառով իրենց ազգականները էս երկրում պաշտոններ են ստացել: Հիմա ես ամեն մեկի ասածը չեմ կրկնելու․ անդաստիարակություն: Մենակ դա էր պակաս, որ դա կարողանար հայհոյել: «Վեր ընկի, նստի տեղդ»․ ի՞նչ պետք ա ասի»:

Ավելի վաղ Ազգային ժողովի դահլիճում կրքերը թեժացան այն բանից հետո, երբ «Հայաստան» խմբակցությունից Արթուր Սարգսյանը դիմելով դատավորի թեկնածու Արմեն Դանիելյանին, ասաց, որ 2021թ նոյեմբերի 15-ին իր լսելու իրավունքը խախտելով, կալանավորել է իրեն: «Ես ասում եմ, որ դուք ապօրինի որոշումներ եք կայացրել: Դուք իմ լսելու իրավունքը չեք ապահովել, որովհետև տղամարդկություն չեք ունեցել նայել իմ աչքերի մեջ և կալանավորել»,- հավելել է նա: Իսկ ելույթից հետո էլ ասաց. «Նայեք իմ աչքերի մեջ», որից հետո իրավիճակը լարվեց:

ՔՊ-ական պատգամավոր Հովիկ Աղազարյանը Արթուր Սարգսյանին ասաց. «Վեր ընկի տեղդ»:

«Ո՞նց թե վեր ընկի տեղդ, դու ով ես, որ ինձ ասես՝ վեր ընկի տեղդ. Դու ոնց կարաս ինձ հետ տենց խոսաս»,- արդեն գոռալով ասաց Արթուր Սարգսյանը:

ԱԺ նախագահ Ալեն Սիմոնյանը ներս հրավիրեց անվտանգության աշխատակիցներին՝ հորդորելով Արթուր Սարգսյանին դուրս տանել դահլիճից:

Ալեն Սիմոնյանը նաեւ դիմեց ԱԺ «Հայաստան» խմբակցության ղեկավար Սեյրան Օհանյանին. «Պարոն Օհանյան, ուզում եմ հասկանալ՝ դու տիրապետո՞ւմ եք իրավիճակին, թե ոչ: Ես դա չեմ տեսնում: կարգի հրավիրեք ձեր պատգամավորին»:

Օհանյանը պատասխանեց. «Տիրապետում ենք իրավիճակին: Դուք շատ բան չեք տեսնում»:

Իր հերթին «Հայաստան» խմբակցությունից Իշխան Սաղաթելյանը բղավեց. «Դուք կարգի հրավիրեք ձեր պատգամավորին: Կարգին խոսա»:

Երբ անվտանգության աշխատակիցները ուժով դուրս էին տանում Արթուր Սարգսյանին, քաշքշուկ սկսվեց, քանի որ մյուս պատգամավորները փորձում էին խոչընդոտել: Արթուր Սարգսյանը բղավեց. «Արա, թողեք հլը, դու պատասխան ես տալու: Հլը սրան նայի, այ բիձա: Ես պտի մտնեմ ներս, ինձ չպիտի հանեք: Ինձ ասում է՝ հլը ռադ էղի ստեղից, այ բիձա: Անպատասխան թողել եք, դրա համար սենց ա անում»:

«Հայաստան» խմբակցությունից Արթուր Խաչատրյանն էլ հավելեց. «Էս ամեն ինչը Հովիկ Աղազարյանի սադրանքն էր, հենց իր անդաստիարակությունն էր, բոլոր իշխանություններին քծնելու ցանկությունն էր»:

Արդեն նիստերի դահլիճից դուրս թեթեւ քաշքշուկ սկսվեց նաեւ «Հայաստան» խմբակցության պատգամավոր Իշխան Սաղաթելյանի եւ անվտանգության աշխատակիցների միջեւ: Մյուս պատգամավորները փորձում էին բաժանել ու պատնեշ ստեղծել նրանց միջեւ: