Այս պատերազմը չերևացող ուժերի դեմ է՝ մեր ամենանվիրական ու նուրբ թելերին դիպչելու և անպատիժ մնալու շատ վտանգավոր քաղաքականություն են որդեգրել.Տեր Աբել

«Մեր ընդհանրական կյանքն, արդեն մի քանի տարի շարունակ, շատ վտանգավոր ձևով չարի ազդեցության տակ է հայտնվել։ Այս հոգևոր պատերազմը, որ վարում են մեր դեմ՝ մարմնի ու արյան դեմ չի։ Այս պատերազմը չերևացող ուժերի դեմ է, որ մեր ամենանվիրական ու նուրբ թելերին դիպչելու և անպատիժ մնալու շատ վտանգավոր քաղաքականություն են որդեգրել»,- «Փաստինֆո» լրատվականի հետ զրույցում ասում է Տավուշի մարզի Մովսես գյուղի Սուրբ Մարիամ Աստվածածին եկեղեցու հոգևոր սպասավոր, Արժանապատիվ Տեր Աբել քահանա Քարտաշյանը։

Ինչպես արդեն հայտնել ենք` Նիկոլ Փաշինյանը երեկ հայտարարել է, որ ճանաչում է Ադրբեջանի տարածքային ամբողջականությունը` 86 հազար 600 քառակուսի կիլոմետր, որը ներառում է նաեւ Լեռնային Ղարաբաղը, անկլավները` նշելով, որ սահմանագծումն իրականացվելու է 1975թ. քարտեզով: Ըստ այդմ՝ Տավուշի մարզի մի քանի գյուղ եւս պետք է հանձնվի թշնամուն, ինչը հասարակության շրջանում մեծ աղմուկ է բարձրացրել։ Հոգեւոր սպասավորը նկատում է՝ այն մարդիկ, որոնց հույսը մշտապես նյութական արժեքներն ու պատկերացումներն են եղել, նրանք, անպայման, հուսահատության մեջ պետք է ընկնեին. «Իսկ ի՞նչ է մեր քարոզածը՝ «Ո՜վ մարդ, եթե քո հույսը մարդու վրա է՝ ամենասոսկալի վիճակի մեջ պետք է ընկնես»։ Աստծուն վերադարձեք մարդի՛կ, խնդրում եմ՝ ապաշխարեցեք։ Ի՞նչ է սա նշանակում, այն, որ մեր մտածելակերպի մեջ շատ կարևոր ու արմատական փոփոխություններ պետք է մտնեն։ Սա ամեն անձի մակարդակում պետք է տեղի ունենա։ Ամեն մարդ պետք է ինքն իրեն հարց տա՝ իմ հույսն ո՞վ է՝ մա՞րդը, թե Աստված։ Այս երկրային արժեքները՝ Հայրենիքս, հողս, տունս պաշտպանելու իմ հույսն ո՞ւմ վրա է, միայն իմ բազկի՞, իմ զենքի՞, իմ կարողությա՞ն…Կամ, որ ավելի վատ է՝ ինչ - որ անձի՞, իշխանավորի՞…Եթե այո, ուրեմն արդյունքը սա է»,- ասում է Արժանապատիվ Տեր Աբել քահանա Քարտաշյանը։

Իմ պայքարը միայն աղոթքն է, ես ուրիշ պայքարի ձև չգիտեմ, ասում է Տեր Աբելը. «Շատ մարդիկ կարող է և չհասկանան, թե ի՞նչ եմ ես հիմա ասում, որովհետև ավելի առերևույթ և նյութականացված են ուզում տեսնեն այդ պայքարի գործիքները, բայց ինձ համար միանշանակ հստակ է, որ այս դիվային վիճակն ու չարությունը մեզանից հեռացնելու միակ ճանապարհը Աստծո զորությունն է»։

Կառավարության շենքի առջև օրեր շարունակ նստացույցի ելած նահատակված մեր զինծառայողների ծնողներին Տեր Աբելը փոխանցում է՝ Աստծով մխիթարվեք, խնդրում եմ, Ավետարանի խոսքով. «Թող կարդան Աստծո խոսքը, որ կարողանան մխիթարություն գտնեն։ Եվ նրանք կտեսնեն Աստծո զորությունը, կտեսնեն, թե ոնց է Աստված գալիս ու պատերազմում իրենց փոխարեն։ Հանգիստ սրտով վերադառնանք Աստծուն և ամեն ինչ լավ կլինի»։