Ապագայի սմարթֆոններ. ի՞նչ հնարավորություններ են օգտատերերը ցանկանում ունենալ նոր սարքերում

Օգտատերերի մեծ մասը ցանկանում է, որ ապագայի սմարթֆոններն ունենա մեծ ծավալի հիշողություն, մեծ էկրաններ և հզոր պրոցեսորներ: Այս մասին են վկայում սմարթֆոնների շուկայում վերջին միտումների և օգտատերերի նախասիրությունների տվյալները, որոնք տրամադրել է հանրահայտ AnTuTu կայքը։

Հիշողություն
AnTuTu-ի վերլուծաբաններն ասում են, որ 6, 8 և նույնիսկ 12 ԳԲ օպերատիվ հիշողությամբ հեռախոսները կորցնում են իրենց արդիականությունը և դառնում պակաս պոպուլյար, իսկ 16 ԳԲ օպերատիվ հիշողությամբ սարքերի ժողովրդականությունն աճում է. նման սարքերն արդեն զբաղեցրել են շուկայի մոտ 10%-ը և առաջ են անցել 6 ԳԲ օպերատիվ հիշողությամբ սմարթֆոններից:

Ինչ վերաբերում է ներկառուցված հիշողությանը, ապա 512 ԳԲ հզորությամբ սարքերը ցույց են տվել աճի ամենաբարձր տեմպերը, իսկ մյուս տարբերակները կորցնում են իրենց արդիականությունը։

Էկրաններ
Էկրանի ամենատարածված չափը դեռ 6,7 դյույմն է. շուկայի սմարթֆոնների մոտ 30,6%-ն ունի այս չափի էկրան: Մյուս կողմից, նման սմարթֆոնների մասնաբաժինը փոքր-ինչ նվազել է՝ առաջին անգամ երկար ժամանակ անց։ Իսկ 6,8 դյույմանոց էկրանների մասնաբաժինը 2022 թ. չորրորդ եռամսյակի 13,7%-ից այս տարվա առաջին եռամսյակում աճել է մինչև 15,9%։ Սա կարող է ցույց տալ, որ այս ոլորտում միտումները փոխվում են, և ապագայում ավելի մեծ էկրանով սարքեր կհայտնվեն շուկայում:

Ինչ վերաբերում է էկրանի լուծաչափին, ապա Full HD+-ը (1080 x 2400 պիքսել) մնում է ամենատարածվածը, իսկ կադրերի հաճախականությունը 120 Հց է՝ շուկայի 38,9% մասնաբաժնով։

Պրոցեսորներ
Այսօր շուկայում առկա պրոցեսորների թվում գերակշռում է Qualcomm-ը՝ 63,5% մասնաբաժնով։ MediaTek-ի մասնաբաժինը կազմում է 21,8%: Միաժամանակ Qualcomm-ն ավելացրել է իր մասնաբաժինը 3,5%-ով, իսկ MediaTek-ը նույնքան կորցրել է։

Օպերացիոն համակարգեր
Android 13-ը ներկայումս համարվում է այս օպերացիոն համակարգի ամենահայտնի տարբերակը՝ շուկայի 42,6% մասնաբաժնով: Երկրորդ տեղում Android 12-ն է՝ 33,3% մասնաբաժնով։ Երրորդ տեղում Android 10-ն է՝ 11.4%, և չորրորդում՝ Android 11-ը՝ 8% մասնաբաժնով։