Հեքիաթներ ադրբեջանցի երեխաների համար. ինտիմ, սպանություն ու բռնություն

Ադրբեջանցի երեխաներին դաստիարակում են բռնություն քարոզող հեքիաթներով։ Ադրբեջանական haqqin.az կայքը գրում է, որ հատկապես աչքի է ընկել «Ղարանղուշ» ամսագիրը։

«Ի՞նչ են անում այս 2 թռչուններն իմ գլխին։ Նրանք սիրով են զբաղվում», մեջբերում է պարբերականը մանկական ամսագրում փղիկի եւ խոճկորի խոսակցությունը։ Ամսագրի խմբագիր Այսել Զահիդքըզիի կարծիքով ծնողներն ուղղակի պարտավոր են երեխաներին սովորեցնել կանանց եւ տղամարդկանց փոխհարաբերությունների նրբությունները, իսկ այս դեպքում՝ ուղղակի բացատրել, թե ինչ բան է սիրով զբաղվելը։

Ադրբեջանցի երեխաների համար գրքերում կան բռնության տեսարաններ եւ ցենզուրայից դուրս բառեր։ Օրինակ՝ «Մոխրոտիկի» համանմանությամբ «Գեղեցկուհի Ֆաթիմա» հեքիաթը պատմում է այն մասին, որ Ֆաթիմայի քույրը կոշիկը հագնելու համար կտրում է ոտքի մատները, իսկ հետո փորձում է ամուսնանալ փադիշահի որդու հետ։ Մեկ այլ հեքիաթում աղջկան պատժում են՝ գլուխը սափրելով եւ ձիուց կապած գետնի վրա քարշ տալով։

Իսկ մեկ այլ հեքիաթում աղջիկը եղբայրների համար ընթրիք պատրաստելիս բրինձ է մաքրում եւ տեսնելով կապույտ բրնձահատիկը՝ կուլ է տալիս այն։ Դրանից հետո աղջիկը հղիանում է։ Իսկ եղբայրները գալիս են տուն, տեսնում, որ նա հղի է եւ որոշում են սպանել նրան։ Երբ աղջիկը փորձում է բացատրել, որ բրնձից է հղիացել, ավագ եղբայրն ասում է կրտսերին. «Գնա՛, սպանի՛ր այդ քածին»։

Բավական չէ, որ եղբայրները սպանում են իրենց քրոջը, դեռ մի բան էլ «քած» են անվանում։ Դա, երեւի թե, պետք է հարստացնի հեքիաթի անչափահաս ընթերցողների բառապաշարը։

NEWS.am