Ավտոմեքենաների անկանոն եւ աննորմալ հոսք Երեւանում

Երեւանցիները նկատել են, որ մայրաքաղաքում ավտոմեքենաների հոսքը կտրուկ մեծացել է: Ընդ որում, Երեւանի փողոցները ծանրաբեռնված են գրեթե բոլոր ժամերին: Փողոցներում խցանումներ են նույնիսկ շաբաթ օրերին:

Այս ամենը հատկապես սրվել է նոյեմբերի սկզբից: Ո՞րն է պատճառը: Շատերը միամտաբար կարծում են, թե պատճառը ռուսաստանցիների հոսքն է, կամ որ աճել է ավտոմեքենա գնողների թիվը: Իրական պատճառը թաքնված է բոլորովին այլ տեղում:

Գյուղատնտեսական աշխատանքների ավարտից հետո Երեւանի մոտակա մարզերի բնակիչները պարզապես մի բանով զբաղվելու կամ գործ կպցնելու կամ պարզապես մոլերում պտտվելու պատրվակով ժամանում են Երեւան եւ անդադար պտտվում քաղաքի տարբեր փողոցներում:

Այս ամենը դժվարացնում է Երեւանի բնակիչների կյանքը: Կոտայքի, Արագածոտնի, Արմավիրի, Արարատի մարզերի բնակիչների մի մեծ զանգված պարզապես ինչ-որ բանով զբաղվելու համար հայտնվում է Երեւանում: Ի՞նչ անել: Նրանց արգելե՞լ մտնել քաղաք: Իհարկե՝ ոչ: Ինչպես կարող ենք սահմանափակել տեղաշարժը, բայց այսպես թողնել եւս չի կարելի: Սա անտանելի իրավիճակ է:

Ընդամենը կարելի է արգելել սեփական ավտոմեքենաներով մուտքը մայրաքաղաք: Կամ որոշակի ժամային սահմանափակումներ մտցնել:

Հովհաննես Կիրակոսյան

Top-News.am