Գերմանիայի արտգործնախարարին ասացի՝ եթե դուք մեկ քայլ անեք մեր դեմ, մենք երկուսը կանենք. Թուրքիայի արտգործնախարար

Թուրքիայի արտաքին գործերի նախարար Մևլյութ Չավուշօղլուն, խոսելով Գերմանիայում խորհրդարանական ընտրությունների ավարտից հետո թուրք-գերմանական հարաբերությունների կարգավորման առումով թուրքական կողմի սպասելիքներից, նշել է, որ չնայած վերջին շրջանում եղած որոշ տարաձայնություններից ու խնդիրներից, Թուրքիան Գերմանիայի հետ վատ հաաբերություններ ունենալու որևէ լուրջ պատճառ չի տեսնում: Այս մասին գրում է թուրքական «Բիրգյուն» պարբերականը:

«Որքան էլ անցյալ տարին թուրք-գերմանական հարաբերությունների համար բարդություններով լի լիներ՝ երկու երկրների միջև լուրջ խնդիրների որևէ պատճառ չեմ տեսնում», - ասել է Չավուշօղլուն:

Նշենք, որ երկու պետությունների հարաբերությունները լարվել են Թուրքիայում Գերմանիայի քաղաքացիների կալանավորումից հետո: Այժմ Թուրքիայի տարածքում կալանքի տակ գտնվող Գերմանիայի քաղաքացիների թիվը հասել է 54-ի, նրանցից 12-ը քաղբանտարկյալներ են: Կալանավորվածների թվում են նաև Ստամբուլի կղզիներում ձերբակալված իրավապաշտպանները, ինչպես նաև գերմանական DW հեռուտառադիոընկերության Թուրքիայի թղթակից Դենիզ Յուջելը, որի արտահանձնման հարցում Թուրքիան շարունակում է համառել:

Ըստ թուրք նախարարի՝ Թուրքիայի ձեռնարկած քայլերն ու վարած քաղաքականությունը Գերմանիայի հարցում բնական էր, քանի որ իրենց տխրեցրել է Գերմանիայում թուրք նախարարներին նախընտրական քարոզչություն իրականանցելու հարցում մերժվելը:

«Ամենից առաջ՝ մենք տարակարծություն ունեինք Թուրքիայում կայացած հանրաքվեի առիթով: Նախընտրական քարոզչության համար Գերմանիա մեկնել պատրաստվող թուրք քաղաքական գործիչների՝ թուրքական սփյուռքի հետ հանդիպումներ կազմակերպելու հարցում ստացած մերժումը մեզ անհանգստացրեց: Ես դեռ մինչ այդ էի ասել Գերմանիայի արտգործնախարար Զիգմար Գաբրիելին՝ եթե դուք մեկ քայլ անեք մեր դեմ, մենք երկուսը կանենք», - շեշտե լ է Չավուշօղլուն:

Հիշեցնենք, որ թուրք-գերմանական հարաբերությունների լարվածության ֆոնին Թուրքիայի նախագահ Ռեջեփ Թայիփ Էրդողանը Բեռլինի ներկայիս քաղաքականությունը համեմատել էր «անցյալում նացիստների գործողությունների» հետ։