Թուրքիայից փախուստի դիմած Սևան Նշանյանը հարցազրույց է տվել թուրքական ամենահայտնի ընդդիմադիր պարբերականին

Պոլսահայ մտավորական, լեզվաբան Սևան Նշանյանը բացառիկ հարցուզրույց է տվել թուրքական ամենահայտնի ընդդիմադիր պարբերականին՝ «Ջումհուրիյեթին», որը սակայն խուսափել է հրապարակել այն՝ Նշանյանի արտահայտած սուր քննադատությունների ու թուրք ազգայնականների և կրոնամոլների դեմ հեգնանքի պատճառով:

Նշանյանը հարցազրույցի ամբողջական պատճենը տեղադրել է սոցցանցերից մեկի իր էջում՝ խոստովանելով, որ վստահ էր, որ այն թուրքական մամուլը չի տպագրի:

Բանն այն է, որ թուրք լրագրողի այն հարցին, թե ինչպիսի Թուրքիա կցանկանա վերադառնալ փախուստի դիմած Նշանյանը, Հունաստանում բնակություն հաստատած հայ մտավորականը պատասխանել է. «Մի այնպիսի Թուրքիա, որտեղ քեմալիստներն ու իսլամիստները կցուցադրվեն թանգարանում` որպես մի տարօրինակություն»:

Ավելի ուշ հարցազրույցն արտատպել է թուրքական hayred.net կայքը՝ շեշտելով, որ հայ մտավորականի որոշ մտքեր իրենք նույնպես չեն կիսում:

«Թուրքական պետությունը թուրքական հասարակությանը ուտող մի քաղցկեղ է: Չեմ կարծում, որ մոտ ապագայում կկարողանան ուշքի գալ: Լուրջ վիրահատական գործողություն է պետք: Իմ կարծիքով՝ խնդիրը մեկ հոգու մեջ չէ, հարցն այն է, որ խնդիրն իրականում շատ ավելի խորն ու մեծ է, և հենց այդ մեկ հոգու «շնորհիվ» է ջրի երես դուրս գալիս: Իշխանությունը փտել է: Կարծում եմ, որ սրանից 100 տարի առաջ ավելի վատ էր փտել: Ինչպե՞ս կարող է նորից ոտքի կանգնել. բնավ գաղափար չունեմ: Ավելին ասեմ՝ արդյոք լավ կլինի՞, եթե ոտքի կանգնի... Դրանում էլ վստահ չեմ», - ասել է Նշանյանը «Ջումհուրիյեթին» տված հարցարզույցում:

Հարցազրույցում Սևան Նշանյանը նաև պատմել է, որ այժմ գտնվում է Հունաստանի Սամոս կղզում, որտեղ տեղավորվել է իր ընկերներից մեկի գյուղական փոքրիկ տանը: Մտավորականը նշել է, որ ամբողջ ժամանակը ծախսում է իր գրքերի վրա աշխատելով, հեծանիվ քշելով կամ Սամոս կղզու գեղատեսիլ վայրերում ու հատկապես լեռնային բարձրունքներում երեկոյան զբոսանքներով:

Նա նաև հայտնել է, որ առաջիկայում արդեն պատրաստվում է նոր նախագծերի վրա աշխատել՝ թե՛ գիտական, թե՛ շինարարական ոլորտում:

Հարցին` արդյոք Նշանյանը հույս ունի՞ երբևէ վերադառնալ Թուքրիա, Նշանյանը պատասխանել է. «Սիրտը «ցանցառ» բան է, միշտ հույս է տածում»:

Հիշեցնենք, որ Նշանյանը թուրքական դատարանի կողմից դատապարտվել էր 17 տարվա ազատազրկման՝ ապօրինի շինարարության և հարկերից խուսափելու համար առաջադրված մեղադրանքով:

Ամիսներ առաջ հայտնի դարձավ, որ 3.5 տարի բանտում գտնվող Սևան Նշանյանը փախուստի է դիմել: Ավելի ուշ հայտնի դարձավ, որ Նշանյանը Հունաստանում է և տեղի իշխանություններից ժամանակավոր կացության իրավունք է ստացել:

Նշենք, որ Նշանյանը գրել է «Սխալ Հանրապետություն» գիրքը (թուրքերեն Yanlış Cumhuriyet), որը ներկայացնում է Թուրքիայի Հանրապետության հիմնադրման առասպելները։ Այն գրված է 1994թ., սակայն շրջանառվում էր լուսապատճենը, մինչև որ հնարավոր եղավ տպագրել 2008թ.:

2010թ.-ին Նշանյանը հրապարակել է Index Anatolicus-ը Թուրքիայի ավելի քան 16.000 տեղանուններով, որոնք փոխվել են թուրքացման քաղաքականության պատճառով։ Ներառված համապարփակ փաստաթղթերը նախկինում չէին հրապարակվել և ներկայացնում են հազարավոր ավանդական անուններ, հիմնականում հունական, հայկական, քրդական, ասորական, արաբական ծագման, որոնք փոխարինվել են թուրքական անուններով 20-րդ դարում։

Index Anatolicus-ն առցանց է դարձել 2011թ.: Ներկայիս տվյալների բազան ներառում է ավելի քան 56.000 քարտեզագրված տեղանուն։