«Թույլ չենք տա վնաս հասցնել ՀՀ-Իրան 47 կմ-անոց սահմանին, Թուրքիայի խորհրդատվության կարիքը չունենք». Իրանցի խորհրդարանականը կրկնել է Ալի Խամենեիին

Իրանի Խորհրդարանի արտաքին հարաբերությունների հանձնաժողովի ղեկավար Շահրիյար Հեյդարին կրկնել է Իրանի գերագույն հոգևոր առաջնորդ Ալի Խամենեիի՝ հուլիսի 19-ին Թուրքիայի, ապա՝ Ռուսաստանի ղեկավարների հետ հանդիպումների ընթացքում հնչեցրած հայտարարությունները, որ Իրանը թույլ չի տա արգելափակել Իրանի սահմանը Հայաստանի հետ: Այս մասին հաղորդում են իրանական ԶԼՄ-ները:

Մատնանշելով ՀՀ-ի ռազմավարական դրությունը, Շահրիյար Հեյդարին նշել է, որ դա Հայաստանի համար շատ խնդիրներ է ստեղծում, որոնցից մեկը ԼՂ հակամարտությունն է Ադրբեջանի հետ, որը հանգեցրեց ռազմական առճակատման, բայց այդ խնդիրը պետք է լուծվի լուրջ ու դիվանագիտական եղանակներով:

Նրա խոսքով, Իրանը մշտապես համարել է, որ այս երկու պետությունները խնդիրը պետք է լուծեն քաղաքական եղանակով:

Հեյդարին նաև ասել է, որ որոշ արտաքին ուժեր ցանկանում են ստեղծել միջանցք, որը Հայաստանով կտանի դեպի Նախիջևան, սակայն Հայաստանն ու Իրանն ընդգծում են, որ տարածաշրջանի երկրների տարածքային ամբողջականությունը պետք է պահպանվի:

 «Մենք Հայաստանի հետ 47 կմ-անոց սահման ունենք, որի մի մասն Արաքս գետի սահմանն է, ու մենք թույլ չենք որևէ վնաս հասցնել այդ սահմանին: Հայաստանի ու Իրանի միջև սահմանը մշտապես եղել է անվտանգ, և դրա անվտանգության համար երկու երկրներն էլ փորձում են միջոցներ ձեռնարկել սահմանին ցանկացած անօրինական տեղաշարժի և ոտնձգության դեմ, և չունեն որևէ երրորդ կողմի, օրինակ՝ Թուրքիայի խորհրդատվության կարիքը»,- հավելել է իրանցի պատգամավորը։