Ո՞վ է արգելում Փաշինյանին հրաժարական տալ

Տաղանդավոր պրոդյուսեր, հայրենասեր Արմեն Գրիգորյանը մահացավ դատարանի դահլիճում: Արմեն Գրիգորյանը կալանավորված էր հորինովի մեղադրանքով հարուցված քրեական գործի շրջանակներում: Արմենին կալանքի տակ պահելու որեւէ տրամաբանական, անգամ անտրամաբանական հիմնավորում գոյություն չուներ:

Արմեն Գրիգորյանը մահացավ դատի ժամանակ: Ո՞վ է մեղավոր: Մեղավորները շատ են՝ քննիչներ, դատախազներ, դատավորներ, բերման ենթարկողներ, այդ ամենը տեսագրչողներ եւ ցուցադրողներ, սակայն կա թիվ մեկ մեղավորը՝ Նիկոլ Փաշինյանը: Նա պետք է ներողություն խնդրեր եւ հրաժարական տար:

Ցանկացած անգամ կիսանորմալ երկրում երկրի ղեկավարը հրաժարական կտար նման սարսափելի դեպքից հետո:

Նիկոլ Փաշինյանը հրաժարական չտվեց անգամ, երբ իր ավտոշարասյունը սպանեց փողոցը նախատեսված տեղից անցնող հղի կնոջը:

Նիկոլ Փաշինյանը հրաժարական չտվեց գների խայտառակ եւ անվերահսկելի աճի եւ դոլարի արժեզրկման պատճառով:

Նիկոլ Փաշինյանը հրաժարական չտվեց ադրբեջանական զորքերի ՀՀ տարածք ներխուժելուց եւ այնտեղ մնալուց հետո:

Նիկոլ Փաշինյանը հրաժարական չտվեց գերիներին հայրենիք չվերադարձնելուց հետո:

Նիկոլ Փաշինյանը հրաժարական չտվեց, երբ պարզ դարձավ, որ նա կարող էր կանգնեցնել պատերազմը 2020-ի հոկտեմբերի 19-ին, բայց չկանգնեցրեց:

Նիկոլ Փաշինյանը հրաժարական չտվեց պատերազմից հետո, անգամ ներողություն չխնդրեց:

Նիկոլ Փաշինյանը հրաժարական չտվեց քովիդի պատճառով մահացության սարսափելի բարձր ցուցանիշների պարագայում:

Նիկոլ Փաշինյանը հրաժարական չտվեց, երբ պարզվեց, որ իր եղբայրը չորս ընկերությունների տնօրեն է:

Նիկոլ Փաշինյանը հրաժարական չի տալիս, քանի որ նրան թույլ չեն տալիս: Դժվար է հավատալ, որ բանական մարդը, որքան էլ որ սիրտ ու հոգի չունենա, այսքանից հետո հրաժարական չտա: Նիկոլ Փաշինյանը հրաժարական չի տալիս, քանի որ նրան թույլ չեն տալիս: Ոչ, թույլ չտվողը ոչ Աննա Հակոբյանն է, ոչ Խաչատուր Սուքիասյանը, ոչ էլ Արսեն Թորոսյանը: 

Թույլ չեն տալիս նրանք, ում ձեռնտու է նման թույլիկ ու կամակատար ղեկավարի առկայությունը:

Եւ սա գիտակցելով մենք բոլորս առավել ուժգին ճնշում պետք է գործադրենք, որ ավելի ուժգնորեն ազդեն Նիկոլ Փաշինյանի վրա, քան նրանք, ովքեր «խաղաղության» օրակարգ են թելադրում: Ինչպե՞ս ճնշենք:շատ ավելի միասնաբար, շատ ավելի մեծ ուժերով, իսկ դրա հնարավորությունն ունենք:

Top-News.am