Փայլանը կիսվել է Հայաստան այցի տպավորություններով

Թուրքիայի ընդդիմադիր Ժողովրդադեմոկրատական կուսակցության անդամ, խորհրդարանի հայազգի պատգամավոր Կարո Փայլանը Հայաստան այցի տպավորություններով կիսվել է Ստամբուլի հայկական պարբերականներից «Ակօսի» հետ:

Փայլանը նշել է, որ Հայաստանի Հանրապետության նախագահ Սերժ Սարգսյանի, վարչապետ Կարեն Կարապետյանի, արտաքին գործերի նախարար Էդվարդ Նալբանդյանի հետ հանդիպումների ընթացքում իրենք խոսել են հայ-թուրքական հարաբերություններից, ինչպես նաև՝ Թուրքիայի հայ համայնքի ներկայիս վիճակի մասին:

Նա հանդիպումների ընթացքում շեշտել է, որ անկախ սահմանների փակ լինելուց՝ Թուրքիայի և Հայաստանի միջև երկխոսությունն այլևս անհրաժեշտություն է, և Թուրքիայում կան բավականին լայն շրջանակներ, որոնք կաջակցեն դրան:

«Ինքս իմ կողմից կանեմ հնարավոր ամեն բան», - խոստացել է Թուրքիայի խորհրդարանի հայազգի պատգամավորը:

Փայլանը նաև նշել է, որ փորձել է կոչ անել հայաստանյան գործընկերներին աջակցել Թուրքիայի ժողովրդավարացմանը, քանի որ միայն ժողովրդավար Թուրքիան է, որ կարող է բացել սահմանը Հայաստանի հետ, ճանաչել Հայոց ցեղասպանությունն ու ստեղծել պայմաններ, որոնցով հանգիստ կապրեն այդ երկրի բոլոր փոքրամասնությունները: