Իշխանությունը նոր Արծրուն Հովհաննիսյան է «ծնում»
«Արցախում հումանիտար աղետ է... Թշնամին շարունակում է մուղամ միացնել, ահաբեկել խաղաղ բնակիչներին, թույլ չի տալիս վերանորոգել միակ գազատարը (ամենայն հավանականությամբ, իրենք են պայթեցրել), այս պահին Արցախը հոսանքազրկված է: Իշխանավորներն էլ հանգստյան օրերն են վայելում, նրանցից ոմանք էլ հասցրել են իրենց ընտանիքները տեղափոխել Արցախից: Արցախը ձեզ չի ներելու, դուք պատասխան եք տալու, դատաստան լինելու է... »,- նախօրեին նման գրառում էր արել Արցախի «Արդարություն» խմբակցության ընդդիմադիր պատգամավոր Մետաքսե Հակոբյանը։
Ի պատասխան, իշխանական «Ազատ հայրենիք» ֆրակցիայի պատգամավոր Արամ Հարությունյանը ըստ էության չհերքեց իշխանավորների՝ իրենց ընտանիքներն Արցախից հանելու փաստը, միաժամանակ «աբառոտկա ֆռռաց», թե ընդդիմադիրներն էլ են իրենց ընտանիքները հանել Արցախից։ Նա, մասնավորապես, գրել է․
«Ընդդիմադիր ուժերի կողմից տարբեր հայտարարություններ են հնչում այն մասին, թե ինչպես են մի շարք պաշտոնյաներ իրենց ընտանիքներին դուրս բերել Արցախից։ Իհարկե, եթե կա նման երևույթ, անպայման պետք է արժանանա համապատասխան գնահատականի։ Բայց նաև կա մտահոգություն, որ սա հերթական պոպուլիստական հայտարարություններից է, որովհետև այդ հայտարարությունը տարածողները չեն նշում որևէ մեկի անունը։
Իհարկե, չեմ բացառում, որ, հնարավոր է, նման մարդիկ լինեն։ Բայց եթե անգամ կան, ես կողմնակից եմ, որ հստակ նշվի տվյալ անձնավորության անուն-ազգանունը և զբաղեցրած պաշտոնը:
Չմոռանանք նաև, որ կան տարբեր դիրքեր զբաղեցնող մարդիկ, ում զավակները Հայաստանի Հանրապետությունում և արտերկրում մշտական բնակություն են հաստատել: Խորհուրդ եմ տալիս, որ այդ մարդիկ նաև նրանց մասին խոսեն, թե չէ մեծ հպարտությամբ նշում են, թե ինչպիսի բարձունքների են հասնում իրենց երեխաները արտերկրում, բայց Արցախում բնակվելու մասին անգամ չեն էլ մտածում:
Եթե այսօր նրանք քննադատում են, որ որոշ մարդիկ լարված իրավիճակում դուրս են հանում իրենց ընտանիքներին, ապա արդյո՞ք քննադատելի չէ իրենց երեխաների՝ այլ երկրներում մշտական բնակություն հաստատելու փաստը: Կխնդրեմ նաև այս երևույթների մասին խոսեք:
ՀԳ. Ինձ մի հարց է տանջում. պարտադիր պե՞տք է լինել պաշտոնյա, որ մնաս Արցախում»,- գրել է պատգամավոր Հարությունյանը։
Hraparak.am-ը «Արդարություն» խմբակցության ղեկավար Դավիթ Գալստյանից հետաքրքրվեց՝ ու՞մ մասին է խոսքը, եւ արդյո՞ք կան նման ընդդիմադիրներ։ Իր իշխանական գործընկերոջը Գալստյանը նախ հորդորեց՝ իրենց հայտարարությունները անանուն-պոպուլիստական անվանելուց հետո ճիշտ կլինի անձամբ անուններ տալ: «Մինչ ինքը անունը կնշի, թե որ ընդդիմադիրի երեխան է բնակություն հաստատել Հայաստանում, ես կարող եմ ասել, եթե խոսքը մեր խմբակցության անդամ Կարեն Հովհաննիսյանի ընտանիքի մասին է, ապա պատգամավորը թող չմոռանա, որ նրանց ընտանիքը ստիպված է տեղափոխվել Հայաստան, երբ իրենց իշխանությունը ստորագրեց Քաշաթաղի շրջանը թշնամուն հանձնելու որոշում։ Հիմա սպասում են այս իշխանության խոստումներին, թե երբ իրենց բնակարան կհատկացնեն, որ վերադառնան Արցախ։ Իմ ընտանիքը, ավելին, գերդաստանը բնակվում է Արցախում, որեւէ մեկը դրսում մշտական բնակություն չի հաստատել, նույնը՝ Մետաքսե Հակոբյանի ընտանիքը»,- շեշտեց պատգամավորը՝ հավելելով․
«Հասկանալի է, որ գրառումը ցավացրել է իրենց, ժողովուրդը տեսնում է՝ ինչ է կատարվում այս օրերին Արցախում։ Ընդհուպ թանկացրել են Ստեփանակերտ-Երեւան տաքսիների գները եւ ավելի թանկ գնով են մարդկանց Հայաստան տեղափոխում՝ նախկին 30 հազարի փոխարեն 40 հազար դրամով։ Իսկ իշխանությունն անգործություն է դրսեւորում, այդ անգործության պատճառով է, որ այսօր ունենք այն, ինչ ունենք»։
Պատգամավորը չցանկացավ անուններ հրապարակել, թե որ իշխանականներն են իրենց ընտանիքներին տեղափոխել Արցախից․ «ԱԱԾ-ն զբաղվում է, այդ մասին հաղորդագրություններ է տարածում, թող ինքն էլ հայտնի»։ Հարկ համարեց շեշտել, որ նույն Մետաքսե Հակոբյանն այսօր հրաժարվել է խորհրդարանական պատվիրակության կազմում Հայաստան գործուղումից՝ համարելով, որ դրա անհրաժեշտությունը չկա․
«Մետաքսե Հակոբյանը, ի տարբերություն բազում իշխանավորների, որոնք փորձում են ինչ-որ պատրվակով Արցախը լքել, ասել է, որ այս դժվարին իրավիճակում չպետք է լքենք Արցախը, այստեղ ապրելով` մեր համառությամբ պետք է օրինակ ծառայենք մեր ժողովրդին։ Բացի դա, ստեղծված իրավիճակում թե ինչ պետք է քննարկեին կրթության ոլորտում, որի համար նշանակված էր գործուղում, հայտնի չէ․ երբ ջեռուցման պատճառով դպրոցները փակ են, եւ աշակերտները դպրոց չեն հաճախում։ Արցախից դուրս գալու երկու պատճառ կարող է լինել՝ առողջական խնդիրներով պայմանավորված հիվանդանոց դիմելու, երկրորդն էլ՝ ստեղծված իրավիճակի հետ կապված հարցեր քննարկելու։ Այսպիսով՝ իշխանությունները փոխանակ Արցախում ստեղծված իրավիճակով զբաղվեն, ընդդիմադիրներով են զբաղված, ոչ միայն չեն հերքում մեր հայտարարությունները, այլ զբաղված են մանիպուլյացիայով ու ապատեղեկատվությամբ, եթե այդ ակնարկները մեր խմբակցությանը նկատի ունեին: Իշխանությունը, պարզ ասած, այս օրհասական պահին կեղծ տեղեկատվություն տարածելով՝ նոր Արծրուն Հովհաննիսյան ծնելով է զբաղված»։
Եվրամիությունը չի հասկանում Իրանում պատերազմի նպատակները. Կալաս
Օրինազանց վարորդները հայտնաբերվել են, մեքենաները՝ տեղափոխվել պահպանվող հատուկ տարածք
Լարիջանիի սպանությունից հետո Իրանը կասետային ռումբերով հարվածել է Թել Ավիվին
Ռոմանոս Պետրոսյանը լուսանկարներ է հրապարակել ՀԷՑ-ի բաշխման ցանցի տրանսֆորմատորային ենթակայաններից
Մարմնամարզության տղամարդկանց հավաքականը տուն է վերադառնում
Ղարաբաղից տեղահանվածները պետք է կապեն իրենց ապագան Հայաստանի հետ
Պետական արգելոցի ֆոտոթակարդները կրկին նկարահանել են կովկասյան ընձառյուծին
Լոնդոնից գնված հայկական եկեղեցու փեղկն ու Արշիլ Գորկու գրաֆիկական աշխատանքն առաջիկա օրերին կցուցադրվ...
Այլ երկրի կողմից մեկ ուրիշ երկիր զորքերի ուղարկումը «շատ նենգ, անխոհեմ և անօրինական» գործողություն է
Գվարդիոլան արդեն այնքան հանդիպումներ է անցկացրել, որ ես չեմ համարձակվի նրան խորհուրդներ տալ