Հայաստանը երջանկության ինդեքսով տարածաշրջանի առաջատարն է

Հայաստանը Համաշխարհային երջանկության զեկույց 2026-ում (World Happiness Report 2026) զբաղեցրել է 89-րդ հորիզոնականը՝ 147 երկրների շարքում։ Երջանկության միջին միավորը (life evaluation score) կազմել է 5.584 (0-10 սանդղակով)։

Այս ցուցանիշով Հայաստանը տարածաշրջանում առաջատարն է՝ առաջ անցնելով իր հարևաններից.

• Վրաստան - 91-րդ տեղ (5.517 միավոր)
• Թուրքիա - 94-րդ տեղ (5.300 միավոր)
• Իրան - 97-րդ տեղ
• Ադրբեջան - 102-րդ տեղ

Հետխորհրդային երկրների շարքում Հայաստանը զիջում է Լիտվային (28-րդ), Ղազախստանին (33-րդ), Էստոնիային (46-րդ), Լատվիային (48-րդ), Ուզբեկստանին (53-րդ), Ղրղզստանին (66-րդ), Մոլդովային (77-րդ) և Ռուսաստանին (79-րդ):

Զեկույցի առաջին հորիզոնականներում, ավանդաբար, գտնվում են հյուսիսային եվրոպական երկրները, որը այս զեկույցում ևս չի փոփոխվել.

Ֆինլանդիա - 1-ին տեղ
Իսլանդիա - 2-րդ տեղ
Դանիա - 3-րդ տեղ
Կոստա Ռիկա և Շվեդիա - 4-5 տեղ

Ամենացածր ցուցանիշներով երկիրը եղել է Աֆղանստանը։

Զեկույցը նշում է, որ Հայաստանը մտնում է բացասական էմոցիաների բարձր մակարդակ ունեցող երկրների տասնյակի մեջ (Աֆրիկայի և Մերձավոր Արևելքի մի շարք պետությունների հետ միասին): Նշվում է, որ սա կարող է կապված լինել սոցիալ-տնտեսական մարտահրավերների, անվտանգության և այլ գործոնների հետ։

Զեկույցը հրապարակվել է Օքսֆորդի համալսարանի Wellbeing Research Centre-ի կողմից՝ Gallup-ի, ՄԱԿ-ի և անկախ խմբագրական խորհրդի հետ համատեղ։ Այն հիմնված է Gallup World Poll-ի տվյալների վրա (2023–2025 թթ.) և գնահատում է կյանքի գնահատականը (Cantril ladder)՝ հաշվի առնելով այնպիսի գործոններ, ինչպիսիք են ՀՆԱ-ն, սոցիալական աջակցությունը, առողջ կյանքի տևողությունը, ազատությունը, առատաձեռնությունը և կոռուպցիայի ընկալումը։