Ի՞նչ ախտանշան կարող է մատնանշել վրա հասնող կաթվածի մասին

Գլխացավը կարող է վկայել իշեմիկ կաթվածի առաջացման մասին։ Այսպիսի եզրահանգման են եկել Ուրալի պետական բժշկական ինստիտուտի եւ Ուրալի դաշնային համալսարանի (Ռուսաստան) հետազոտողները։

Ինչպես տեղեկացնում է «Газета.Ru»-ն՝ հղում կատարելով կրթության եւ գիտության նախարարությանը, նոր հետազոտությունը հիմնվել է պացիենտների գլխացավի ուսումնասիրման վրա, քանի որ այդ ախտանշանը վերահաս կամ արդեն տեղի ունեցած կաթվածի նշաններից մեկն է։

Գիտնականները առանձնացրել են 3 խումբ.

պացիենտներին արդեն ծանոթ ցավ;
ցավ, որը հետազոտվողը մինչ այդ երբեք չի ունեցել;
փոփոխվող ցավ (ինտենսիվությամբ, տեւողությամբ եւ ուղեկցող այլ ախտանշաններով)։
Պարզվել է, որ ցավի առաջին եւ վերջին տեսակները ամենից հաճախ լինում են այն հիվանդների մոտ, որոնք արդեն կաթված տարել են։ Այդ խմբի 15 տոկոսի մոտ եղել է գլխացավ կաթվածից մեկ շաբաթ առաջ, եւս 15 տոկոսը տեղեկացրել է, որ այդպիսի ցավ զգացել է կաթվածի ամենասկզբում։

Մասնագետները ստացված տվյալները համեմատել են կաթվածի առաջացրած գլխացավերի արդեն գոյություն ունեցող չափորոշիչների հետ, իսկ հետո թարմացրել ախտորոշման մեթոդները։ Մասնագետների կարծիքով՝ կատարված աշխատանքը թույլ է տալիս բացահայտել կաթվածը պացիենտների մեկ երրորդի մոտ։