Բողոքի ցույցերից հետո Անկարայի պետական համալսարանի գործունեությունը ժամանակավորապես դադարեցվել է

Այսօր Թուրքիայում տեղի ունեցող բռնաճնշումները 1980թ.-ի սեպտեմբերի 12-ի հեղաշրջումից հետո ամենածանր հարվածն են։ Այս մասին պնդում են Թուրքիայի նախարարների խորհրդի նոր որոշմամբ աշխատանքից ազատված ակադեմիկոսները:

Նշենք, որ 1980թ. հեղաշրջումը Թուրքիայում համարվում է ամենաարյունալին:

Ինչպես գրում է Ստամբուլի հայկական պարբերականներից «Ակօսը»` այժմ արդեն գործազուրկ դարձած դասախոսները, որոնք առանձնանում էին իրենց ժողովրդավարական սկզբունքներով և իշխանությունների հանդեպ քննադատությամբ, ներքին ճնշման են ենթարկվել նաև մինչ աշխատանքից ազատվելը:

«Հեղաշրջման փորձից հետո մեզ բարև տվողների թիվն օր օրի քչանում էր: Այսպիսի մթնոլորտում ֆակուլտետում մեր գտնվելը շատ էր դժվարացել», - նշել է դասախոսներից մեկը:

Ինչպես ավելի վաղ հայտնել է tert.am-ը` այսօր Անկարայի համալսարանի 72 ակադեմիկոս դասախոսներն ու նրանց ուսանողները շարունակել են համալսարանի բակում բողոքի ցույցերը: Ոստիկաններն արցունքաբեր գազ և ջրցան մեքենաներ են կիրառել:

Այս ամենի ֆոնին ժամանակավորապես դադարեցվել է ամբողջ համալսարանի գործունեությունը:

Հիշեցնենք, որ Թուրքիայի նախարարների խորհրդի վերջին որոշմամբ երկրում աշխատանքից ազատվել է 4.464 պետական ծառայող, որոնցից 350-ն ակադեմիկոսներ են:
Ամենածանր հարվածը հասցվել է Անկարայի պետական համալսարանին, որտեղ աշխատանքից ազատվել է 72 ակադեմիկոս:
Արդյունքում փակվել են նաև մի քանի առաջատար ֆակուլտետներ, համալսարանի ծրագրից վերացվել է 30 դաս: Ավելի քան 50 դիպլոմային աշխատանք մնացել է առանց ղեկավարի:

tert.am