Քիմիական նյութից զանգվածային թունավորում Թուրքիայում. մի ամբողջ գյուղ է տարհանվել

Թուրքիայի հարավ-արևելքում գտնվող Սիիրթ (Սղերդ) նահանգում ավելի քան 150 մարդ թունավորվել է քիմիական նյութից, հայտնում է թուրքական «Էվրենսել» պարբերականը:

Նշվում է, որ նախօրեին Սիիրթի Աքթաշ գյուղում քիմիական նյութից թունավորման պատճառով համայնքի բնակիչներն ամբողջովին տարհանվել են, 152 տուժածներից հիվանդանոց է տեղափոխվել 90-ը, նրանցից 40-ը հոսպիտալացվել են, նրանց թվում՝ 23 երեխա:

Հայտնի է, որ ևս 50-ը շարունակում են բուժօգնություն ստանալ «Կարմիր մահիկի» վրաններում, իսկ մի քանի գյուղացի դուրս է գրվել հիվանդանոցներից նույն օրը:

Լրատվամիջոցները նշում են, որ զանգվածային քիմիական թունավորման պատճառ կարող էր դառնալ գյուղում բնակվող երկու երեխաների կողմից մոտակա տարածքում գտնված և գյուղ բերված անհայտ տարրան, որը բացելուց հետո այն հավանաբար խառնվել է տեղի աղբյուրի ջրին և դարձել զանգվածային թունավորման պատճառ: