Վրաստանի իշխող կուսակցությունը ՏԻՄ ընտրություններին քաղաքապետի 2 հայ թեկնածու է առաջադրել

Տեղական ինքնակառավարման մարմինների ընտրություններին իշխող «Վրացական երազանք-դեմոկրատական Վրաստան» կուսակցությունը կողմնորոշվել է Նինոծմինդայի եւ Ախալքալաքի քաղաքապետի թեկնածուների հարցում, նրանց շարքում երկու հայ կա, հաղորդում է Jnews.ge-ն:

Իշխող կուսակցությունը արդեն կողմնորոշվել է քաղաքապետի թեկնածուների հարցում Վրաստանի 9 շրջաններում եւ Թբիլիսիում: «Վրացական երազանք-դեմոկրատական Վրաստան» կուսակցությունը տեղական ինքնակառավարման մարմինների 2017 թվականի ընտրություններին մասնակցում է քաղաքապետերի 61 թեկանածուներով:

Սամցխե-Ջավախքում «Վրացական երազանք-դեմոկրատական Վրաստան» կուսակցությունը կներկայացնեն 6 թեկնածուներ: Կուսակցությունը Բորժմիում քաղաքապետի թեկանածու է առաջադրել Լեւան Լիբարտիային, Ադիգենում՝ Զաքարիա Էնդելաձեին, Ասպինձայում՝ Ռոստոմ Մագրակվելիձեին, Ախալցիխեում՝ Զազա Մելիքիձեին, Նինոծմինդայում՝ Անիվարդ Մոսոյանին, Ախալքալաքում՝ Յուրիկ Ունանյանին:

Քաղաքապետերի 61 թեկնածուներից ընդամենը երկուսն են կին, Թինանեթիում՝ Լելա Կիտեշաշվիլին եւ Նինոծմինդայում՝ Անիվարդ Մոսոյանը:

Նշենք, որ Վրաստանի նախագահ Գեորգի Մարգվելաշվիլին քաղաքների ու շրջանների ղեկավարների, ինչպես նաեւ տեղական օրենդիր մարմինների (սակրեբուլո) պատգամավորների ընտրությունները նշանակել է հոկտեմբերի 21-ին:

NEWS.am