Պարտվեցինք 5:0, որ Գերմանիայից չպարտվենք 15:0

Ֆուտբոլի Հայաստանի հավաքականը Երեւանում անփառունակ պարտություն կրեց Հյուսիսային Մակեդոնիայի հավաքականից եւ 12 միավորով մնաց 4-րդ տեղում, այն դեպքում, երբ հաղթանակի դեպքում հայտնվելու էր երկրորդ տեղում:

Ցավալին այն է, որ պարտվեցինք մի հավաքականից, որը գրանդ չէ, անգամ ոչնչով առավել չէ մեր հավաքականից: Հիշեցնենք, որ Սկոբիեում այս հավաքականների հանդիպումն ավարտվել էր 0:0 հաշվով:

Իհարկե, հավաքականի մարզիչը կարող է օրինակ վերցնել Հայաստանը ղեկավարող առաջնորդից եւ հայտարարել՝ մենք պարտվեցինք 5:0, որ Գերմանիայից չպարտվեինք 15:0 կամ մենք պարտվեցինք 5:0, որ Հենրիխ Մխիթարյանն ու Տիգրան Բարսեղյանը ծանր վնասվածքներով երկար ժամանակ շարքից դուրս չգային:

Ի դեպ, Ռումինիա-Իսլանդիա հանդիպումն ավարտվեց 0:0 հաշվով եւ հյուսիսմակեդոնացիները հաղթանակից հետո ամրացան երկրորդ տեղում: Մյուս խաղում գերմանացիները ամբողջ խաղն անցկացնելով մեկ ավելի ֆուտբոլիստով Լիխտենշտեյնին հաղթեցին 9:0 հաշվով:

B խմբում անակնկալ, իսկ իսպանացիներին շատ հաճելի անակնկալ մատուցեցին վրացիները, 2:0 հաշվով հաղթելով շվեդիային, ինչը թույլ տվեց Իսպանիայի ընտրանուն հավակնել առաջին տեղին:

H խմբում ռուսները 6:1 հաշվով հաղթեցին Կիպրոսին, իսկ Խորվաթիան 7:1՝ Մալթային: Այստեղ պայքարն առաջին տեղի համար Ռուսաստանի եւ Խորվաթիայի միջեւ շարունակվում է:

Մեր միակ սփոփանքն այս ամենի մեջ կարող է լինել միայն այն, որ Ադրբեջանը սեփական դաշտում 3:1 հաշվով զիջեց գաճաճ Լյուքսեմբուրգի հավաքականին:

Top-News.am