Փաշինյանը մտավ Մյասնիկյանի արձանի շրջակայք և սկսեց բղավել՝ ի՞նչ եք ծափ տալիս, քարեր վերցրեք ու փայտեր.դրվագ մարտի 1-ից

Ես լավ չեմ պատկերացնում այն ֆորմատը, երբ մեղսակիցները քննում են հանցագործությունը: Այս մասին ԱԺ-ում ելույթի ժամանակ ասաց «Պատիվ ունեմ» խմբակցության քարտուղար Հայկ Մամիջանյանը՝ անդրադառնալով 44-օրյա պատերազմը քննող ԱԺ հանձնաժողով ստեղծելու իշխանության նախաձեռնությանը:

Մեկնաբանելով ՊՆ նախարարի՝ ՀՀ սահմանը հատած ադրբեջանցիներին ոչնչացնելու հրահանգը՝ Հայկ Մամիջանյանն ասաց. «Մի հատ ինձ կասեք, ե՞րբ էր դրա հակառակ հրամանը եղել: Ինչքան ՔՊ-ական ֆեյք կար, տարածում էր դա ֆեյսբուքում: Կա՛մ ընդունեք, որ այն տեղեկությունը, թե չկրակելու հրաման է եղել, համապատասխանում է իրականությանը, կա՛մ էլ ՊՆ նոր նախարար է եկել և տարրական հրամաններ է տալիս, որոնք բխում են կանոնակարգից»,-ասաց Մամիջանյանը:

Ի պատասխան իշխանական պատգամավորների դիտարկումներին՝ Բաղրամյան պողոտայում ակցիաների վերաբերյալ, Հայկ Մամիջանյանը դրվագ հիշեցրեց մարտի 1-ից.

«Երբ Նիկոլ Փաշինյանը մտավ Մյասնիկյանի արձանի շրջակայք, ցուցարարները սկսեցին ծափահարել նրան, իսկ նա բարձր բղավեց՝ ի՞նչ եք ծափ տալիս, քարեր վերցրեք ու փայտեր: Այդ քարերն ու փայտերը կարող էին լինել մարտի 1-ի 10 զոհերից յուրաքանչյուրի մահվան պատճառ»,-ասաց Մամիջանյանը: