Բրիտանացի գիտնականը դիաբետով տառապողների համար արդյունավետ դիետա է առաջարկում

Հերթագայությամբ սնվելը կարող է արդյունավետ միջոց լինել 2-րդ տիպի դիաբետի բուժման եւ կանխարգելման համար: Նման պնդմամբ է հանդես եկել Լոնդոնի համալսարանական քոլեջից նյարդակենսաբան Նիք Լեսիցան, որի հոդվածը հրապարակվել է The Conversation-ում:

Լեսիցան որպես օրինակ ներկայացրել է երկու հետազոտություն, որոնց արդյունքները հրապարակվել են 2017 թվականին: Առաջինում նկարագրված է մկների վրա փորձված դիետա, որոնց օրգանիզմը լեպտին չի արտադրում (հագենալու զգացողությունը կարգավորելուն մասնակցող հորմոն):

Կենդանիները մշտապես չափից շատ են կերել եւ վաղ տարքիից դիաբետով են տառապել: Հերթագայությամբ սննդակարգի հետեւելուց (7 օր սովորական սննդակարգ, 4 օր՝ ցածր ածխաջրածնային սննդակարգ) մի քանի ամիս անց կենդանիների մոտ հիվանդության ախտանշաններն անհետացել են, մարմնի զանգվածը նվազել է: Բացի այդ՝ կարգավորվել է մկների ենթաստամոքսային գեղձի աշխատանքը, որը պատասխանատու է ինսուլինի արտադրության համար:

Երկրորդ հրապարակման մեջ նկարագրված է հերթագայությամբ սննդակարգի արդյունքը, որն արձանագրվել է 100 մարդու մասնակցությամբ հետազոտությունից հետո: 30 օր նրանք դիետայի են հետեւել, որը ներառել է 25 օր անսահմանափակ սնունդ, 5 օր՝ սահմանափակ սննդակարգ: Փորձի ավարտից հետո բոլոր մասնակիցների արյան մեջ շաքարի մակարդակը նվազել է:

Լեսիցան նշել է, որ նման սննդակարգի արդյունավետության մասին միանշանակ եզրահանգումներ անելու համար ավելի մեծ թվով կամավորների մասնակցությամբ երկարատեւ հետազոտություններ են անհրաժեշտ: Մյուս կողմից, ըստ նյարդակենսաբանի, արդեն գոյություն ունեցող տվյալները մատնանշում են առնվազն ավելորդ քաշ ունեցողների եւ դիաբետով հիվանդների համար սնվելու նման ռեժիմի արդյունավետությունը:

NEWS.am Medicine