Դուք հեղաշրջման փորձի զոհը չեք, դուք հենց հեղաշրջման փորձն իրականացնողն եք. քուրդ պատգամավորը՝ Թուրքիայի իշխանություններին

Թուրքիայի քրդամետ Ժողովրդադեմոկրատական կուսակցության խոսնակ, Ուրֆայից ընտրված պատգամավոր Օսման Բայդեմիրը մեղադրել է իշխանություններին կանխամտածված կերպով հեղաշրջման փորձ բեմականացնելու համար:

Ինչպես գրում է թուրքական demokrathaber.org կայքը, Բայդեմիրը հայտարարել է, որ Թուրքիայի իշխանությունները ոչ թե հեղաշրջման փորձի զոհն են, այլ դրա իրականացնողը:

«Հեղաշրջում անողը դո՛ւք եք: Դուք հեղաշրջման փորձի զոհը չեք, դուք հենց հեղաշրջման փորձն իրականացնո՛ղն եք: Դո՛ւք եք իրականացրել հեղաշրջման փորձը, որը նախագահ Էրդողանը որակում է որպես Ալլահի պարգև», - ասել է Բայդեմիրը:

Քուրդ պատգամավորը նաև շեշտել է, որ հեղաշրջման փորձի կազմակերպման համար մեղադրվող թուրք կրոնական քարոզիչ ֆեթուլլահ Գյուլենի «Հիզմեթ» խմբավորման անդամներին 12 տարի շարունակ աջակցողը հենց Էրդողանի իշխանությունն է եղել:

Հիշեցնենք, որ 2016-ի հուլիսի 15-ին Թուրքիայում տեղի է ունեցել ռազմական հեղաշրջման փորձ: Դրան հաջորդել են ձերբակալությունները երկրի զինված ուժերում և այլ կառույցներում, փակվել են բազմաթիվ թերթեր, կազմակերպություններ, կենտրոններ, երկրում հայտարարվել է արտակարգ դրություն: Հեղաշրջման փորձի համար Թուրքիայի նախագահ Ռեջեփ Թայիփ Էրդողանը մեղադրում է «Հիզմեթ» («Ծառայություն») կրոնական շարժման հիմնադիր և իր հակառակորդ Ֆեթուլլահ Գյուլենին: