Ադրբեջանի կարատեի ֆեդերացիան բարդ իրավիճակում է հայտնվել

Ադրբեջանի կարատեի ֆեդերացիան բարդ իրավիճակում է հայտնվել, երբ կորցրել է գլխավոր հովանավորի աջակցությունն՝ ի դեմս Ադրբեջանի միջազգային բանկի:

Ինչպես հայտնում է Qafqazinfo-ն, շուրջ մեկ տարի է, ինչ ֆեդերացիայի մարզիկներն աշխատավարձ չեն ստանում: Բացի այդ, նրանց արգելել են մարզվել «Ինտեր Արենա» մարզադաշտում, քանի որ տարածքի վարձակալության համար նույնպես չի վճարվում:

Երկրի սպորտի նախարարությունը խոստացել է հովանավորներ գտնել ֆեդերացիայի համար, սակայն առայժմ որևէ առաջընթաց չի գրանցել այդ հարցում:

Նշվում է, որ բազմաթիվ մարզիկներ զրկվում են միջազգային սեմինարիներին մասնակցելու հնարավորությունից:

Ֆեդերացիայի փոխնախագահ և թիմի մարզիչ Ռահման Խաթամովը նույնպես լքել է իր պաշտոնը, իսկ ծանր վիճակում հայտնված մարզիկները ելք են փնտրում ստեղծված իրավիճակից:

Ավելի վաղ հաղորդվել էր, որ Ադրբեջանի ըմբիշները մտադիր են բոյկոտել աշխարհի առաջնությունը, որն անցկացվելու է Փարիզում օգոստոսի 21-26-ը: Ըմբիշները հրաժարվել են մարզումներից և մտադիր չեն ելույթ ունենալ աշխարհի առաջնությունում՝ երկար ժամանակ աշխատավարձ չստանալու պատճառով:

Հիշեցնենք, որ Ադրբեջանի ամենախոշոր բանկը՝ Ադրբեջանի միջազգային բանկը, որը հայտնվել է փլուզման եզրին երկրում արժույթի դեֆիցիտի և արժութային սուր ճգնաժամի հետևանքով, դադարեցրել է արտաքին պարտքի վճարումներ անել։