Վրաստանը կարող է օգտագործել ազատ առեւտրի ռեժիմը թուրքական հումքով ապրանքները ԵՄ արտահանելու համար

Թուրքիայի եւ Վրաստանի միջեւ Ազատ առեւտրի մասին համաձայնագրում կատարվել են կարեւոր փոփոխություններ, որոնք կնպաստեն երկու երկրների տնտեսական համագործակցության ընդլայնմանը, հայտնում է «Նովոստի-Գրուզիան»՝ վկայակոչելով Վրաստանի եւ Թուրքիայի դեսպանություններին:

Դիվանագիտական ներկայացուցչությունների տեղեկություններով՝ Թուրքիայի խորհրդարանը փոփոխությունները հաստատել է փետրվարի 10-ին: Դրանք առավելապես վերաբերում են «ապրանքի ծագում» հասկացության սահմանմանը:

Դրանից բացի, փոփոխությունները թույլ են տալիս ազատ առեւտրի ռեժիմի շրջանակում Վրաստանից ԵՄ արտահանել ապրանքներ, որոնք արտադրվել են թուրքական հումքով:

«Համաձայնագրի շնորհիվ կմեծանա արտադրանքի տեսականին, որը կարող է արտահանվել ԵՄ: Սա օգուտներ կբերի ինչպես վրացական, այնպես էլ թուրքական բիզնեսին»,- նշված է հայտարարության մեջ:

Դեսպանությունում համոզված են, որ սա կխթանի Վրաստանի տնտեսության մեջ թուրքական ներդրումները, կնպաստի համատեղ ընկերությունների եւ նոր աշխատատեղերի ստեղծմանը:

Թուրքիան Վրաստանի հիմնական առեւտրային գործընկերն է: 2020 թվականին երկրների միջեւ արտաքին առեւտրաշրջանառությունը կազմել է գրեթե 1,6 մլրդ դոլար: Թբիլիսին եւ Անկարան ազատ առեւտրի մասին համաձայնագիրը վավերացրել են 2008 թվականին:

Վրաստանը նաեւ ազատ առեւտուր է կատարում ԵՄ-ի, Ազատ առեւտրի եվրոպական ասոցիացիայի (EFTA) երկրների, Հոնկոնգի եւ Չինաստանի հետ: Ակտիվորեն քննարկվում է Ճապոնիայի եւ ԱՄՆ-ի հետ համանման համաձայնագրերի ստորագրման հնարավորությունը: Բանակցություններ են սկսվել նաեւ Հնդկաստանի հետ:

Երկրի էկոնոմիկայի նախարարության տվյալներով՝ անցյալ տարի Վրաստանի զուտ արտահանման 87 տոկոսը բաժին է ընկել ազատ առեւտրի ռեժիմով երկրներին: