Համավարակի ընթացքում մարդիկ ավելի շատ են մտածում սեփական ավտոմեքենա ձեռք բերելու մասին. հետազոտություն

Կորոնավիրուսի համավարակի ընթացքում ամբողջ աշխարհում մարդիկ ավելի ակտիվ են սկսել օգտվել ավտոմեքենաներով եւ ավելի հաճախ են մտածում սեփական ավտոմեքենան ձեռք բերելու մասին: Այդ մասին վկայում են Capgemini ընկերության իրականացրած սոցիոլոգիական հետազոտության արդյունքները, հաղորդում է DW-ը:

Հարցմանը մասնակցել է 11 հազար մարդ ամբողջ աշխարհում: Ընդ որում՝ հարցվածների 87 տոկոսը նշել է, որ գերադասում է օգտվել սեփական տրանսպորտային միջոցով, որպեսզի անվտանգ զգա ուղեւորության ժամանակ: Նախքան համավարակն այդ թիվը կազմել է 57 տոկոս:

Հետազոտության արդյունքները ցույց են տալիս, որ ամբողջ աշխարհում հարցվածների 78 տոկոսը գերադասում է սեփական տրանսպորտային միջոցը հանրային տրանսպորտին: Համեմատության համար նշվում է, որ Գերմանիայում այդ պնդման հետ համաձայնել է հարցվածների 74 տոկոսը:
Միեւնույն ժամանակ COVID-19 համավարակի ֆոնին ամբողջ աշխարհում սպառողների շրջանում մեծացել է առաջիկայում սեփական ավտոմեքենան ձեռք բերելու ցանկությունը: 2020 թվականի ապրիլից աշխարհում այդպիսի մտադրություն ունեցող հարցվողների թիվն աճել է՝ 35 տոկոսից հասնելով 46-ի, իսկ Գերմանիայում՝ 25 տոկոսից հասնելով 39-ի:

Ընդ որում՝ մեքենա գնելու մտադրության մասին հայտնածների շուրջ կեսը խոստովանել է, որ անցած տարվա համեմատ կրճատել են իրենց պահանջները եւ պատրաստ են գնել ավելի համեստ համալրմամբ կոմպակտ մոդելներ:

Հարցումն անցկացվել է 2020 թվականին երեք անգամ՝ ապրիլին, հոկտեմբերին եւ նոյեմբերին: Ընդ որում՝ ամեն անգամ դրան մասնակցել է 11 հազար մարդ Գերմանիայից, Մեծ Բրիտանիայից, Ֆրանսիայից, Իտալիայից, Իսպանիայից, Նիդերլանդներից, Նորվեգիայից, ԱՄՆ-ից, Չինաստանից եւ Հնդկաստանից: Այդ երկրների շուկաներում 2019 թվականին վաճառվել է ամբողջ աշխարհում ավտոմեքենաների 62 տոկոսը: