Հակառակորդի նպատակն է եղել՝ 2-3 օրվա ընթացքում 10-15 կիլոմետր մխրճվել Արցախի ՊԲ-ի խորություն. Սեյրան Օհանյան
Այսօր դիրքային պատերազմ է ընթանում։ Այս մասին այսօր՝ հոկտեմբերի 1-ին, հրավիրված ճեպազրույցի ժամանակ հայտարարեց Պաշտպանության նախկին նախարար, գեներալ-գնդապետ Սեյրան Օհանյանը։
«Դիրքային պատերազմի ժամանակ անմիջական շփման պայմաններում տեղի են ունենում հակազդեցության սպառազինությամբ եւ ռազմական տեխնիկայի, օդուժի կիրառմամբ, ինչպես նաեւ ստորաբաժանումների համապատասխան գործողություններ»,- ասաց գեներալ-գնդապետը։
Նա իր շնորհակալական խոսքն ու խոնարհումը հայտնեց զոհված զինծայողներին. «Ուզում եմ իմ շնորհակալական խոսքն ու խոնարհումն արտահայտել առաջին հերթին այն զինծառայողներին, որոնց հմուտ գործողությունների, հերոսական, քաջարի, նրանց թափված արյան շնորհիվ կարողանում ենք մեր առջեւ դրված խնդիրն իրականացնել։ Մենք պատերազմի ժամանակ հասկանում ենք, որ լինում են կորուստներ, դրանք անվերադարձ կորուստներ են։ Միշտ դեմ եմ եղել կորուստ բառն ասել, որովհետեւ մենք ոչ թե կորցրել, այլ գտել ենք մեր հերոս զավակներին, հրամատարներին, սպաներին, ենթասպաներին, պայմանագրային զինծառայողներին, ժամկետային սերժանտներին, ժամկետային զինվորներին, կին զինծառայողներին, որոնց քաջարի գործողությունների շնորհիվ մենք բարձրացրել ենք հայ ժողովրդի պատիվը։ Դուք չեք պատկերացնում մարտական գործողությունների ժամանակ ինչպիսի հերոսական դրվագներ կան, ինչպիսի հմուտ գործողություններով են մեր հրամանատարները կարողանում ղեկավարել իրենց ստորաբաժանումները։ Դուք չեք պատկերացնում՝ ինչպիսի հմուտ գործողություններով են կարողանում մեր զինծառայողները խոցել հակառակորդի օդուժը, անօդաչու թռչող սարքերը, չնայած նրան, որ քանակական որոշակի առավելություն ունեն նրանք։ Դուք չեք պատկերացնում, թե ինչպիսի հերոս զավակներ ունենք. մեկ ժամվա գործողություններով հակատանկային միջոցներով մեկ հոգով շուրջ 7-8 զրահատեխնիկա է խոցում։ Դուք չեք պատկերացնում, թե մեր հրետանավորներն ինչպիսի դիպուկ հնարքներով են կարողանում ճնշել, խոցել համապատասխան ստորաբաժանումները։ Դուք չեք պատկերացնում, թե ինչպես մեր հերոսական քաջարի հրամանատարները եւ զինվորները մերձամարտի մեջ մտնում հակառակորդի հետ եւ նրան ոնչնացնում։ Կողք կողքի կանգնած պապ, որդի եւ թոռ կռվում են մեր հայրենիքի համար»։
Գեներել-մայոր Ջալալ Հարությունյանն իր շտաբով, ողջ անձնակազմով հմուտ գործողություններ է իրականացնում՝ կանխարգելելու հակառակորդի համապատասխան գործողությունները։ Այս մասին այսօր՝ հոկտեմբերի 1-ին, հրավիրված ճեպազրույցի ժամանակ հայտարարեց Պաշտպանության նախկին նախարար, գեներալ-գնդապետ Սեյրան Օհանյանը։
«Այսօր ինձ համար մեծ պատիվ է Արցախի իշխանությունների պլանի համաձայն ներկա գտնվել այս հանդիպմանը եւ ներկայացնել այն իրավիճակը, որը տիրում է Արցախում եւ մարտական գործողությունների թատերաբեմում։ Այսօր ոչ միայն Հհայաստանի Հանրապետության, Արցախի ժողովրդի, այլ նաեւ միջազգային հանրության ուշադրության կենտրոնում է Արցախը եւ Արցախում տեղի ունեցող այն գործողությունները, որոնք սադրել են Արդբեջանի զինված ուժերը։ Ոչ միայն Արցախյան ազատամարտի, ոչ միայն 2014-2015 թվականի լարված դիվերսիոն հետախուզական գործողությունների, 2016 թվականի ապրիլյան մարտական գործողությունների, 2020 թվականի Տավուշյան մարտական գործողությունների, այլ նաեւ այսօրվա իրականության մեջ սադրիչ կողմը Ադրբեջանի Հանրապետության զինված ուժերն են, բայց այս անգամ Թուրքիայի անմիջական մասնակցությամբ. նրա սպառազինության, նրա կողմից փորձառու փորձագետների, հրահանգիչների, նրա կողմից պատվիրված տարբեր երկրների վարձկանների»,- ասաց Օհանյանը։
Գեներալ-գնդապետը նշեց, որ այսօր յուրաքանչյուր գիտակից անձ արցախցու կողքին է։
Սեյրան Օհանյանը հայտնեց, որ Պաշտպանության նախարարներով հանդիպումներ են ունեցել Արցախի Հանրապետության նախագահի հետ, այցելել են Պաշտպանության նախարար Ջալալ Հարությունյանին, հայտնել են իրենց աջակցությունը. «Տիրապետում ենք իրավիճակին, ծանոթացել ենք այն աշխատանքներին, որոնք այսօր իրականացնում է Պաշտպանության բանակի ղեկավարությունը։ Գեներել-մայոր Հարությունյանն իր շտաբով, իր ողջ անձնակազմով հմուտ գործողություններ է իրականացնում՝ կանխարգելելու հակառակորդի համապատասխան գործողությունները։ Ծանոթանալով նրա կողմից կատարվող աշխատանքներին, եկել ենք այն եզրակացությանը, որ Արցախի պաշտպանության բանակը եւ նրա հրամանատարական կազմն իրենց շարունակական զարգացմամբ՝ կատարելագործումն ապահովել են եւ այսօրվա հրամանատարն իր ենթակաների հետ միասին փորձառու կերպով ղեկավարում է մարտական գործողությունները։ Մենք հասկացանք, որ նրա ղեկավարման կետում բան չունենք անելու։ Մեր մնացած գործողություններն իրականացնում ենք Արցախի ժողովրդի եւ մնացած բոլոր միջոցառումներին՝ մեր հնարավորության շրջանակներում»։
Անդրադառնալով սեպտեմբերի 27-ին ընթացող ռազմական գործողություններին՝ Սեյրան Օհանյանն ասաց.
«Ադրբեջանի եւ Թուրքիայի մասնակցությամբ հերթական անգամ, օգտագործելով խաղաղ պայմանները, սադրիչ գործողություններ են նախատեսել եւ սեպտեմբերի 27-ին օգտագործելով իրենց զինանոցի ողջ կազմը, կատարելով համապատասխան խոցման եւ ազդեցության միջոցառումներ՝ անցել են հարձակման իրենց մոտոհրաձգային, հրաձգային եւ տանկային ստորաբաժանումներով՝ մի քանի ուղղություններով։ Նրանց հեռահար նպատակն է եղել 2-3 օրվա ընթացքում մխրճվել մարտավարական խորության՝ մոտ 10-15 կիլոմետր Արցախի պաշտպանության բանակ, այնուհետեւ պարտադրանքի լեզվով խոսել եւ Արցախի եւ Հայաստանի Հանրապետության ղեկավարության հետ՝ հետագա բանակցային գործընթացում։ Նրանք խախտել են պայմանավորվածությունները՝ ուժի չկիրառման հարցում։ Հանդիպելով Արցախի պաշտպանության բանակի հմուտ գործողություններով պայմանավորված դիմադրությանը՝ ստանալով հսկայական ծավալով եւ՛ անձնակազմի, եւ՛ սպառազինության, եւ՛ ռազմական տեխնիկայի, եւ՛ օդուժի, եւ՛ անօդաչու թռչող սարքերի խոցումներին, ըստ էության, չեն կարողացել հասնել իրենց նպատակներին»։