Ռոբերտ Նազարյանը հարցաքննվել է մի քանի անգամ
Հանրային ծառայությունները կարգավորող հանձնաժողովի նախկին նախագահ Ռոբերտ Նազարյանի խափանման միջոցի վերաբերյալ Երևանի ընդհանուր իրավասության դատարանի որոշման դեմ պաշտպանները վերաքննիչ բողոք կներկայացնեն՝ վիճարկելով հիմնավոր կասկածը։ Այս մասին «Փաստինֆո»-ի հետ զրույցում ասաց պաշտպան Գագիկ Խաչիկյանը։
Հիշեցնենք, որ օգոստոսի 8-ին Երևանի ընդհանուր իրավասության դատարանը՝ դատավոր Արտակ Թադևոսյանի նախագահությամբ, մերժել է Ռոբերտ Նազարյանին կալանավորելու ՀՔԾ քննիչի միջնորդությունը։
«Արդյունքները բնականաբար գոհացուցիչ են, բայց բովանդակության վերաբերյալ ունենք մեր դիրքորոշումը, կբողոքարկենք»,- ասաց Խաչիկյանը։
ՀՀ հանրային ծառայությունները կարգավորող հանձնաժողովի նախկին նախագահ Ռոբերտ Նազարյանին նախաքննական մարմինը մեղադրում է ՀՀ քրեական օրենսգրքի 308-րդ հոդվածի 2-րդ մասով՝ պաշտոնեական լիազորությունները չարաշահելու համար, որն առաջացրել է ծանր հետևանքներ։
Ըստ ՀՔԾ հաղորդագրության՝ քրեական գործի նախաքննության ընթացքում բավարար ապացույցներ են ձեռք բերվել, որ Ռոբերտ Նազարյանի և հանձնաժողովի վերը նշված անդամների գործողությունների պատճառով «Ձորագետ Հիդրո» ՍՊ ընկերության հիդրոէլեկտրակայանից արտադրված և առաքված էլեկտրական էներգիայի վաճառքի համար 2012-2019 թվականների ընթացքում սահմանվելիք սակագների փոխարեն նույն ժամանակահատվածների համար սահմանվել են կրկնակին գերազանցող սակագներ, որի հետևանքով «Ձորագետ Հիդրո» ՍՊ ընկերության կողմից ՀՀ-ում էլեկտրաէներգիա սպառող ֆիզիկական և իրավաբանական անձանցից հավելյալ ստացվել է առանձնապես խոշոր չափերի՝ 7,052,065,099 ՀՀ դրամ գումար:
Ռ.Նազարյանը չի ընդունել իրեն մեղսագրվող մեղադրանքները՝ այն գնահատելով անհիմն ու ապօրինի։
Ըստ նրա՝ Ռ.Նազարյանը հարցաքննվել է ու ցուցմունք տվել քննությանը հետաքրքրող հարցադրումների շուրջ։ Բովանդակությունը փաստաբանը չմանրամասնեց՝ վկայակոչելով նախաքննության գաղտնիությունը, սակայն փաստեց, որ իրենց գնահատմամբ Նազարյանը գործել է իրենց վերապահված լիազորությունների շրջանակներում առանց որեւէ խախտում թույլ տալու եւ վստահ են, որ առաջադրված մեղադրանքում բացակայում է հիմնավոր կասկածը, ինչի արձանագրմանը փորձելու են հասնել վերաքննիչ դատարանում։
Ընդ որում՝ նշենք, որ նրա դեմ որեւէ ցուցմունք չկա քրեական գործում, համենայն դեպս առերես հարցաքննություն տեղի չի ունեցել։ «Փաստինֆո»-ի տեղեկություններով՝ Ռ.Նազարյանը մի քանի անգամ հարցաքննվել է դեռեւս վկայի կարգավիճակում, իսկ կասկածյալի ու մեղադրյալի կարգավիճակում արդեն պնդել է իր նախկինում տված ցուցմունքները։
Ռոբերտ Նազարյանի նկատմամբ կալանավորումը որպես խափանման միջոց ընտրելու մասին միջնորդությունը մերժելու որոշումը բողոքարկելու հարցը կքննարկվի նաև դատախազությունում՝ դատական ակտը ստանալուց հետո։ ՀՀ գլխավոր դատախազի՝ ԶԼՄ-ների հետ կապերի գծով խորհրդական Գոռ Աբրահամյանը «Փաստինֆո»-ի հետ զրույցում ասաց, որ դատարանի որոշումը դեռևս չի ստացվել ՀՀ գլխավոր դատախազություն։
«Ստանալուց հետո կծանոթանանք դատարանի հիմնավորումներին և դրա արդյունքում կորոշվի վերաքննիչ բողոք ներկայացվում է, թե ոչ»,- նշեց Աբրահամյանը: