Ամենատարբեր հաշվարկներով Հայաստանում հսկայական ստվերային տնտեսություն գոյություն ունի. վարչապետ
2019 թվականը բյուջետային առումով պատմական տարի էր Հայաստանի Հանրապետության համար: Այս մասին այսօր Ազգային ժողովում տեղի ունեցող «ՀՀ 2019 թվականի պետական բյուջեի կատարման մասին» տարեկան հաշվետվության քննարկման ժամանակ հայտարարեց Նիկոլ Փաշինյանը:
«ՀՀ կառավարությանը հաջողվեց ի սկզբանե նախատեսվածից 104 միլիարդ դրամ ավելի հարկային եկամուտներ գեներացնել, որոնցից 62 միլիարդ դրամը դարձան պետական բյուջեի եկամուտներ, իսկ 42 միլիարդ դրամի չափով մոտավորապես վերադարձվեց ավելացրած արժեքի հարկի պարտքը, որը ձևավորվել էր մինչև 2017 թվականի հունվարի մեկը: Սա, կարծում եմ, պատամական իրադարձություն էր»,-ասաց նա:
Վարչապետը նշեց նաև, որ 2019 թվականին վերջին 12 տարվա համար աննախադեպ տնտեսական աճ է գրանցվել՝ 87,6 տոկոս: «Մեր կառավարությունը վայելում է պատմական տարիներում գործելու, կամ իրագործելու հնարավորությունը»,-ասաց նա:
Անդրադառնալով կորոնավիրուսի հետևանքներին, վարչապետն ասաց, որ կորոնավիրուսի այս ժամանակաշրջանը նոր է սկսվել, դեռ անհայտ է, թե որքան այն կտևի։
«Ես խորհուրդ կտայի, որ մենք չշտապեինք հետևություններ անել այս առումով, թե ինչպիսին կլինի 2020 թվականը: Կարծում եմ, որ կորոնավիրուսի այս ժամանակաշրջանը նոր է սկսվել, դեռ անհայտ է, թե ինչքան այն կտևի, և՛ արդյունքները, և՛ նույնիսկ կորուստներն ամփոփելու համար դեռևս վաղ է:
Բյուջեի կատարողականի քննարկման համատեքստում նա անդրադարձավ կառավարության՝ ի սկզբանե որդեգրած կոնցեպցային, որը անվանում են՝ «ճգնաժամը՝ որպես հնարավորություն»:
«Ես կարծում եմ, որ հիմա՝ հենց այս օրերին Հայաստանի Հանրապետությունում խորը գերագնահատման գործընթաց է տեղի ունենում: Եվ այդ խորը գերագնահատաման գործընթացը կապված է պետական կարգի և անհատի փոխհարաբերությունների հետ: Կարծում եմ, որ հիմա կորոնավիրուսի համաճարակի հետևանքով, բայց արդյունքում մենք պետք է վերագնահատենք պետական կարգի և անհատի հարաբերությունները, քանի որ հին ընկալմամբ օրենքները գրում են իշխողները, որպեսզի մեզ՝ քաղաքացիներիս, պահեն իրենց հսկողության տակ: Նոր ընկալմամբ՝ պետք է լինի այնպես, որ օրենքները ստեղծում ենք մենք բոլորս ՝ որպես համակեցության կանոնների ամբողջություն, որպես պայմանավորվածություն, թե ինչպես ենք մենք ապրելու և հարաբերվելու իրար հետ: Կորոնավիրուսային ժամանակաշրջանում մենք պետք է վերագնահատենք մեր վերաբերմունքը կարգապահության և ընդհանրապես մեր քաղաքացիական պարտականությունների նկատմամբ»,-ասաց նա:
Վարչապետը, խոսելով բյուջեի հետ կապված ընկալումների մասին, ասաց, որ նոր ընկալումը պետք է լինի այն, որ պետական բյուջեն մեր ընդհանուր դրամապանակն է, որը մենք ձևավորում ենք միասին՝ մեր ընդհանուր կարիքները հոգալու համար: Ամեն դեպքում նա նշեց, որ չեն հավաքագրել, բյուջե չեն մուտքագրել այն ամբողջ ներուժը, որը տեսականորեն և իրականում գոյություն ունի: «Ամենատարբեր հաշվարկներով Հայաստանում հսկայական ստվերային տնտեսություն գոյություն ունի և նույնիսկ որոշ գնահատականներ կան, որ բյուջեի հավաքագրման ներուժը կարող էր ավելի լիներ մինչև, օրինակ, 400 միլիարդ դրամից»,-ասաց նա: