Թուրքիայի իշխանությունները թույլատրել են խռովարարների հետ կապերի մեջ կասկածվող 98 մարդու ձերբակալությունը
Թուրքիայի դատախազության մարմինները 98 մարդու ձերբակալության օրդեր են տվել, որոնց կասկածում են «Ֆեթուլլահականների ահաբեկչական կազմակերպության» (ՖԵՏՕ) հետ կապերի մեջ, որին Անկարան մեղադրում է 2016 թվականի հուլիսի հեղաշրջման փորձի կազմակերպման մեջ: Haberturk հեռուստաալիքը հայտնում է, որ 33 մարդ Թուրքիայի արդարադատության նախարարության գործող աշխատակից է:
Նախարարության աշխատակիցների ձերբակալության շուրջկալները միաժամանակ սկսվել են երկրի 15 նահանգներում, այդ թվում՝ Անկարայում: Ներկայումս ձերբակալված է 71 կասկածյալից 50-ը: Օրդերներ են տրվել ոչ միայն գերատեսչության 33 հաստիքային աշխատակիցների համար, այլեւ տեխնիկական անձնակազմի, անվտանգության աշխատակիցների եւ այլ անձանց համար, որոնք արդարադատության նախարարությունում պայմանագրով էին աշխատում:
Դրան զուգահեռ՝ եւս 11 նահանգներում ձերբակալություններ են կատարվել Ադանա նահանգի իշխանությունների կողմից քննվող գործով: 27 մարդու կասկածում են ոստիկանությունում պաշտոնավարելու քննությունների արդյունքների նենգափոխման մեջ: Նրանք ձերբակալվել են եւ հարցաքննության տարվել, փոխանցում է ՏԱՍՍ-ը:
Հիշեցնենք, որ 2016 թվականի հուլիսի 15-ին Թուրքիայի ԶՈՒ մի խումբ զինվորներ եւ սպաներ նախաձեռնել էին պետական հեղաշրջման փորձ: Հիմնական դիմակայությունը ծավալվել էր Ստամբուլում եւ Անկարայում, զոհվել էր 250 մարդ՝ չհաշված խռովարարներին, ավելի քան 2 հազար մարդ վիրավորվել էր: Անկարան հեղաշրջման նախապատրաստման մեջ մեղադրում է իսլամի քարոզիչ Ֆեթուլլահ Գյուլենին եւ նրա հետ կապված ՖԵՏՕ-ին: