Պայթեց ԱՄՆ-ում հայկական լոբբիի միֆը. Մ․ Հակոբյան
Պայթեց ԱՄՆ-ում հայկական լոբբիի միֆը, ՀՀ վարչապետին ընդունեց միայն Կալիֆոռնիայի նահանգապետը․ այս մասին ֆեյսբուքյան իր էջում գրառում է կատարել հասարակական, քաղաքական գործիչ Միհրան Հակոբյանը։
Գրառումն ամբողջությամբ ներկայացնում ենք ստորև․
«Ցավով եմ արձանագրում. պայթեց ԱՄՆ-ում հայկական լոբբիի միֆը: Հայաստանի վարչապետին, իր իսկ խոսքով ասած՝ համաշխարհային ժողովրդավարության Դանկոյին ընդունեց միայն Կալիֆորնիայի փոխնահանգապետը, իսկ հանրահավաքին նախատեսվածից առնվազն երեք անգամ քիչ մարդ էր մասնակցում: Եվ, սա այն Կալիֆորնիայում, որտեղ մոտ 1 միլիոն հայեր են ապրում: Ցավոք, սա է հայկական լոբբի ասվածի, ԱՄՆ-ում քվեարկող ազգությամբ հայերի ուժի և ազդեցության գնահատականը:
Ի դեպ, այս օրերին ամերիկահայ կազմակերպությունների նեկայացուցիչներն իրենց հարցազրույցներում կարմիր թելով միտք էին առաջ տանում՝ ինչու՞ Հայաստանը չպետք է Իսրայելի նման լինի: Այո, ցանկալի է, որ այդպես լինի:
Բայց նաև հայկական լոբբին պետք է հրեականի նման լինի, գոնե կեսի չափ, գոնե 20 տոկոսի չափ: Ի՞նչ եք կարծում, Իսրայելի վարչապետին այդ կե՞րպ են դիմավորում ԱՄՆ-ում: Հայաստանի արտաքին քաղաքականության ստրատեգիաների բալանսից ուղղակի պետք է դուրս գրել ԱՄՆ հայկական լոբբին՝ որպես միֆ և վաղուց պայթած փուչիկ, որից նույնիսկ Բաքվում արդեն չեն տպավորվում»: