Իրան–Հայաստան միասնականությունն է դժվարացնում «Զանգեզուրի միջանցքի» բացմանը. Քեմալ Քըլըչդարօղլու

Թուրքիայի նախագահի թեկնածու Քեմալ Քըլըչդարօղլուն անդրադարձել է «Զանգեզուրի միջանցքի» հետ կապված հարցին։

Թուրքական BaBala Tv–ի հաղորդման ժամանակ մասնակիցներից մի երիտասարդ հետաքրքրվել է Քեմալ Քըլըչդարօղլուից, թե ինչո՞ւ նա իր նախընտրական ծրագրում ներառված Թուրքիա–Չինաստան երթուղուց դուրս է թողել Ադրբեջանին եւ չի անդրադարձել «Զանգեզուրի միջանցքին», որը նեղացրել է նաեւ Ադրբեջանի նախագահ Իլհամ Ալիեւին։

Քեմալ Քըլըչդարօղլուն նշել է, թե ինքը ինչպես մյուս թուրք գործիչները լավ է վերաբերվում Ադրբեջանին եւ ընտրվելու դեպքում առաջին այցերը լինելու են Կիպրոսի թուրքական հատված եւ Ադրբեջան։ Նա շեշտել է, թե իր նախագծի նպատակն է միավորել Թուրքիան Միջին Ասիայի թյուրքական հանրապետությունների հետ, իսկ կենտրոնական դերում լինելու է Թուրքիան։

Քըլըչդարօղլուի խոսքով՝ «Զանգեզուրի միջանցքը» կարեւոր է Թուրքիայի եւ թյուրքական աշխարհի համար, սակայն Իրան–Հայաստան միասնականությունը դժվարացնում է այդ միջանցքի բացումը։

Եթե Թուրքիային հաջողվի համոզել Հայաստանին ու մյուս երկրներին, որ այդ միջանցքը տարածաշրջանի երկրների զարգացման համար կարեւոր նշանակություն է ունենալու, ապա Թուրքիան տարածաշրջանում ավելի հզոր կդառնա։