Սեպտեմբերի 27-ից մինչեւ նոյեմբերի 9-ը կան պլանավորած բազմաթիվ միջոցառումներ. Կտեսնեք փողոցային ակցիաներ. Սաղաթելյան
Այո, մենք սկսելու ենք փողոցային պայքար, որովհետեւ միայն խորհրդարանական գործունեությամբ այն մարտահրավերները, սպառնալիքները, որ կանգնած են մեր երկրի առջեւ, չենք կարող չեզոքացնել: Այս մասին, այսօր՝ սեպտեմբերի 24-ին, ԱԺ-ում լրագրողների հետ ճեպազրույցի ժամանակ նշեց ԱԺ փոխնախագահ, «Հայաստան» խմբակցության անդամ Իշխան Սաղաթելյանը:
«Սեպտեմբերի 26-ին ունենք երթ, դրանից հետո կտեսնեք բազմաթիվ ակցիաներ եւ գործողություններ:
Հոկտեմբերի առաջին շաբաթվանից սկսած «Հայաստան» խմբակցության պատգամավորները ամբողջ Հայաստանի տարածքում սկսելու են նաեւ մարզային այցելություններ, փշումներ քաղաքացիների հետ: Սեպտեմբերի 27-ից մինչեւ նոյեմբերի 9-ը կան պլանավորած բազմաթիվ միջոցառումներ»,-ասաց նա՝ հավելելով, որ բացի այդ, նաեւ առաջիկայում տարբեր հարցերով բազմաթիվ քննիչ հանձնաժողովներ են լինելու:
«Խաղաղությունը չեն մուրում, պարտադրում են. խաղաղություն մուրալով իրենք պատրաստելու են կամ նոր պատերազմ, կամ նոր կապիտուլյացիա»,-ընդգծեց Սաղաթելյանը:
Նա հիշեցրեց, որ դեռ 12 օր առաջ իրենք պահանջել են ԱԺ հրավիրել պաշտպանության նախարարին, ԱԱԾ տնօրենին, դատախազին, ԱԳ նախարարին եւ անցկացնել փակ ռեժիմով քննարկել Կապան-Գորիս ճանապարհին ստեղծված իրավիճակը. «Մինչեւ այս պահը մերժում չկա, բայց փաստն այն է, որ հանդիպումը չի կայացել: Տարբեր մանկական պատճառաբանություններ են բերում: Սա անում է այն իշխանությունը, որը խոսում է համատեղ աշխատանքից, կառուցողական քայլերից»,-ասաց ԱԺ փոխխոսնակը: