Ոչ մի ագրեսիվ հայտարարություն չի օգնի ԼՂ հակամարտության կարգավորմանը. Զախարովա

Ագրեսիվ հռետորաբանությունը չի բերի Լեռնային Ղարաբաղի հակամարտության կարգավորմանը: Անհրաժեշտ է հստակ գործողություններ նախաձեռնել, որոնք ուղղված կլինեն տարածաշրջանում լարվածության նվազմանը:

ТАСС գործակալության փոխանցմամբ՝ այս մասին «Դոժդ» հեռուստաալիքի եթերում ասել է ՌԴ ԱԳՆ պաշտոնական ներկայացուցիչ Մարիա Զախարովան:

«Ոչ մի ագրեսիվ հայտարարություն երբեք չի բերի անկեղծ արդյունքի, եթե այնուամենայնիվ մենք իսկապես անկեղծորեն ցանկանում ենք հասնել լարվածության թուլացմանը Լեռնային Ղարաբաղում»,- ասել է Զախարովան:

Դիվանագետն ընդգծել է, որ հակամարտության հաջող կարգավորման համար անհրաժեշտ է նախապատվությունը տալ հստակ գործողություններին և ոչ թե թշնամական հռետորաբանությանը:

Հիշեցնենք, որ սեպտեմբերի 27-ին Ադրբեջանի զինուժը լայնածավալ հարձակում է սկսել Արցախում՝ թիրախավորելով նաև խաղաղ բնակչությանը։

Հոկտեմբերի 8-ի դրությամբ Արցախի զինուժը խոցել է հակառակորդի՝ 16 ուղղաթիռ, 17 ինքնաթիռ, 145 անօդաչու թռչող սարք, 496 միավոր զրահատեխնիկա, հիմնականում տանկեր, 82 ավտոտրանսպորտ, 10 զրահափոխադրիչ, 4 «ՏՕՍ-1Ա» ծանր հրանետային համակարգ, 4 «Սմերչ» և 1 «Ուրագան» տիպի համազարկային կրակի ռեակտիվ կայանքներ:

Հակառակորդն ունի ավելի քան 4069 զոհ, ավելի քան 5270 վիրավոր։ Հայկական կողմից, նախնական տվյալներով, կա 361 զոհ։ Ադրբեջանի զինված ուժերը թիրախավորել է նաև Արցախի և Հայաստանի Հանրապետության զինվորական և քաղաքացիական ենթակառուցվածքները, որի հետևանքով Արցախում սպանվել է 20 քաղաքացիական անձ, վիրավորվել է 93 քաղաքացիական անձ, վնասվել՝ մոտ 5800 գույք ու ենթակառուցվածք։

Ադրբեջանական զինուժի հրետակոծության հետևանքով վիրավորվել են ինչպես արտասահմանյան, այնպես էլ տեղական լրատվամիջոցների լրագրողներ։ Հայաստանում և Արցախում սեպտեմբերի 27-ին հայտարարվել է ռազմական դրություն։