Փաշինյանի պոպուլիզմի ծանր հետեւանքները

Տնտեսությունում, բյուջեում իրավիճակն այնքան մտահոգիչ է, որ անգամ ՀՀ ֆինանսների նախարար Ատոմ Ջանջուղազյանը չդիմացավ եւ սեպտեմբերի 3-ի կառավարության նիստում հայտարարեց. «Օրակարգի 33-րդ հարցով նախատեսվում է պահուստային ֆոնդից հատկացում կատարել, որը, ճիշտն ասած, չի քննարկվել՝ ենթադրում եմ հրատապությամբ պայմանավորված: Ուղղակի ուզում էի տեղեկացնել, որ այս ձեւով ընդունելու դեպքում ձեւակերպման եւ իրականացման խնդիր կառաջանա, քանի որ պահուստային ֆոնդը ներկա պահին գործնականում ամբողջությամբ ծանրաբեռնված է»:

«Գործնականում ամբողջովին ծանրաբեռնված» թարգմանաբար նշանակում է պահուստային ֆոնդը սպառվել է: Նիկոլ Փաշինյանի պոպուլիզմը քայքայեց նաեւ տնտեսությունը, բյուջեն: 

Եթե ծանրաբեռնվածությունը դրված է պահուստային ֆոնդի վրա, նշանակում է բյուջեում, մեղմ ասած, վիճակը լավ չէ: Եւ սա կորոնավիրուսային համավարակի հետեւանք չէ, սա տնտեսական ապաշնորհ եւ պոպուլիստական քաղաքականության հետեւանքն է, սա նաեւ կորոնավիրուսային համավարակի ընթացքում անհեթեթ որոշումների հետեւանքն է:

Պոպուլիզմ, պոպուլիզմ, պոպուլիզմ: Ամենուր պոպուլիզմ: Պարգեւավճարներ, օրենքի կոպիտ խախտումով նախարարների, փոխնախարարների, մարզպետների աշխատավարձերի շեշտակի բարձրացում, եւ այլն եւ այլն:

Պահուստային ֆոնդի հաշվին ուզում են դպրոցներն ապահովել ախտահանիչներով, բժշկական դիմակներով, օլիմպիական խաղերին մասնակից մարզիկներին թոշակով:

Այս ծանր իրավիճակում բյուջեի հաշվին ոստիկանության համար 150 նոր ավտոմեքենա են գնում:

Այսպես շարունակվելու դեպքում իրավիճակն ավելի ծանր է դառնալու: Այնպես որ, ընտրությունը ՀՀ քաղաքացունն է՝ հանդուրժելու է բյուջեի մսխումը, հանդուրժելու է այն ցինիզմը, որով աշխատում է կառավարությունը, հանդուրժելու է երկիրը թուլացնելը, թե քայլ է անելու անդունդ տանող անիվի ընթացքը կանգնեցնելու համար:

Իսկ մինչ այդ քայլեք Երեւանի կենտրոնով, ծանոթացեք վաճառվող եւ վարձով տրվող տարածքներին, փակված ռեստորաններին եւ խանութներին եւ պատկերացրեք իրավիճակի ամբողջ ծանրությունը: 

Վարդան Մխիթարյան

Top-News.am