Դուք մթերք արտահանելու ճանապարհը օլիգարխների համար եք բացել, որ նորից հարստանան. Ծղուկի բնակիչը` Նիկոլ Փաշինյանին (տեսանյութ)

Այսօր ՀՀ վարչապետ Նիկոլ Փաշինյանն այցելել է Սյունիքի մարզի Ծղուկ համայնք՝ ծանոթանալու համայնքի խնդիրներին։

Ծղուկի բնակիչները վարչապետին ներկայացրին, որ համայնքի հողերից ոչ մեկը չի պատկանում համայնքի բնակիչներին, այլ տրամադրված է հարակից համայնքների բնակիչներին։

Նրանցից մեկն ասաց, թե բոլոր հողերը վարձակալել են ուրիշները, վարչապետը հետաքրքրվեց, թե ինչ լուծում կա այս հարցին ու ասաց, որ միայն այս համայնքում չի այս խնդիրը, և Կադաստրի կոմիտեն պետք է զբաղվի խնդրով։

Բնակիչներից մեկն էլ ասաց, որ տեղական շուկային պետք է ուշադրություն դարձնել, օրինակ` մսին, կարող են նաև տեղական միսն արտահանել։ «Դուք բացել եք ճանապարհներ մթերք արտահանելու համար, բայց բացել եք դա օլիգարխների համար, որ նորից հարստանան»։

Բնակչի դիտարկմամբ` պետք է արգելվեն նաև սառած մսերի, կաթի փոշիների ներկրումը, վարչապետն ասաց, որ կարող են այդ հարցը քննարկել, սակայն այդպես մթերքները կթանկանան։ Սակայն բնակիչը առարկեց՝ առանց դրա էլ ամեն ինչ թանկացել է։

Փաշինյանը վերջում շեշտեց, որ յուրաքանչյուր ներկայացված խնդիր գրի է առնվել, սակայն այս պահին որևէ հարցի պատասխան չունի։

Մանրամասները՝ տեսանյութում: