Բելառուսում վիրավոր ակտիվիստների բուժման համար գրեթե 1 միլիոն դոլար է հավաքվել

Բելառուսում օգոստոսի 9-ին տեղի ունեցած նախագահական ընտրություններից հետո սկսված բողոքի ակցիաների և բախումների ժամանակ տուժած քաղաքացիներին օգնություն տրամադրելու համար կազմակերպված դրամահավաքի ընթացքում հավաքվել է գրեթե 1 միլիոն դոլար: Այս մասին տեղեկացնում է dw.com կայքը:

«Մեկ միլիոն վիրավորների, ձերբակալվածների և հալածվածների համար: Վաղը մենք արձանագրություն կհրապարակենք, թե ինչպես պետք է տուժածները դիմեն օգնության համար»,-իր ֆեյսբուքյան էջում գրել է ակցիայի կազմակերպիչներից Ալեքսեյ Լեոնչիկը:

Դրամական միջոցների հավաքագրումը սկսվել էր դեռևս շաբաթներ առաջ` BY Help նախաձեռնության կողմից: Այն ժամանակ ենթադրվում էր, որ հավաքված գումարը տրամադրվելու է բողոքի ակցիաների ժամանակ ձերբակալվածների տուգանքների մարմանը:

Բելառուսի ԿԸՀ-ն հրապարակել է ընտրությունների նախնական արդյունքները. երկրի գործող ղեկավար Ալեքսանդր Լուկաշենկոն հավաքել է ձայների 80,08, իսկ ընդդիմադիր թեկնածու Սվետլանա Տիխանովսկայան՝ 10,09%-ը:

Ընտրություններին հաջորդել են բողոքի ակցիաները: Այս գիշեր ևս Մինսկում ցուցարարների և ՕՄՕՆ-ականների միջև բախումներ են տեղի ունեցել, ուժայինները ռետինե փամփուշտներ են կիրառել քաղաքացիների նկատմամբ, հնչել են կրակոցներ և պայթյուններ:

Մինչդեռ երկրի նախագահ Ալեքսանդր Լուկաշենկոն հայտարարել էր, որ հետընտրական բողոքի ակցիայի մասնակիցները ղեկավարվել են Լեհաստանից, Մեծ Բրիտանիայից և Չեխայից՝ հեռախոսակապի միջոցով:

«Մենք պարզել ենք՝ զանգերը եղել են արտասահմանից՝ Լեհաստանից, Մեծ Բրիտանիայից և Չեխիայից: Նրանք զանգահարում էին ու ղեկավարում մեր, կներեք իհարկե, բայց ոչխարներին: Նրանք չեն հասկանում՝ ինչ են անում, բայց նրանց ևս կառավարելու են»,-ասել է Լուկաշենկոն ԱՊՀ Գործադիր կոմիտեի, Համադաշնության դիտորդական առաքելության ղեկավար Սերգեյ Լեբեդևի հետ հանդիպման ժամանակ:

Լուկաշենկոն նաև հայտարարել է, որ թույլ չի տա երկրում «մայդան» անել, և երկիրը պառակտելու փորձերին ադեկվատ պատասխան կտա:

«Թույլ չենք տա պառակտել երկիրը»,-ասել է նախագահը:

Այս թեմայով Մինսկում ընթանում է ընդդիմության «փայլուն երթը» Բելառուսի ՆԳՆ-ն հաստատել է Մինսկում ընդդիմության բողոքի ակցիայի ժամանակ տեղի ունեցած հրաձգությունն ու նշել է ձերբակալվածների թիվը Տիխանովսկայայի աջակից Օլգա Կովալկովան հայտնել է, որ Բելառուսի իշխանություններն իրեն դուրս են բերել երկրից «Մեկը բոլորի եւ բոլորը մեկի համար»․ Տիխանովսկայան հայտարարել է Միասնության քայլերթ Մինսկում «Նրանց «ֆաս» հրաման է տրվել». Լուկաշենկոն մեկնաբանել է մերձբալթյան երկրների կողմից Բելառուսի նկատմամբ սահմանված պատժամիջոցները