Իմացեք ում եք սպառնում (տեսանյութ)

Առարկում եմ դատարանի անգործության դեմ, երբ մեղադրող կողմն անհարգալից վերաբերմունք դրսեւորելով ձեր հանդեպ ոչ թե ձեզ է դիմում, որպեսզի դուք, ըստ մեղադրանքի կողմի, մյուս կողմի անհարգալից վերաբերմունքը կանխեք։ Այս մասին այսօր՝ հուլիսի 7-ին, Երեւանի ընդհանուր իրավասության դատարանի Շենգավիթի նստավայրում ընթացող ՀՀ երկրորդ նախագահ Ռոբերտ Քոչարյանի եւ մյուսների գործով դատավարությանը հայտարարեց Ռոբերտ Քոչարյանի պաշտպաններից Հայկ Ալումյանը։

«Իմ մյուս կողմում հանդես եկող կոլեգան ձեր գործողությունների դեմ առարկությունների դատավարական գործիքն օգտագործեց ինչ-որ միջնորդություն ներկայացնելու համար։ Սկսեց ձեր գործողությունների դեմ առարկություններով եւ վերջացրեց նրանով, որ միջնորդեց մեզ սահմանափակել դատախազների միջնորդությունների վերաբերյալ առարկություններ ներկայացնելու հարցում։ Այսինքն՝ կողմն ակնահայտորեն անբարեխիղճ է օգտագործում դատավարական գործիքակազմը։ Առարկում եմ, որ դուք դրան ուշադրություն չեք դարձնում։ Առարկում եմ ձեր անգործության դեմ, երբ մեղադրող կողմն անհարգալից վերաբերմունք դրսեւորելով ձեր հանդեպ ոչ թե ձեզ է դիմում, որպեսզի դուք, ըստ մեղադրանքի կողմի, մյուս կողմի անհարգալից վերաբերմունքը կանխեք»,- ասաց Ալումյանը։

Պաշտպանի խոսքով՝ մեղադրող կողմն արդեն անտեսում է դատարանին եւ ինքն իր հարցերն է փորձում լուծել պաշտպանական կողմի հետ. «Մեղադրող կողմը կիսասպառնալից, թե իրականում սպառնալից բաներ է ասում, մեզ պետք չի սպառնալ, մեզ էնքան են սպառնացել, այդ թվում, նաեւ ձեր գիտությամբ, որ ինչ էլ սպառնաք, նորություն չի լինելու, համ էլ իմացեք՝ ում եք սպառնում»։