Իսպանիայի կառավարությունը մինչև 1000 եվրո կբաժանի կարիքավոր ընտանիքներին

Իսպանիայի կառավարությունը գործարկել է բնակչության կենսաապահովման ծրագիր, որը հասարակության առավել խոցելի խմբում գտնվողներին նվազագույն եկամտի չափով աջակցություն է տրամադրում, հայտնում է Euronews-ը։

Աղբյուրը մանրամասնում է, որ հունիսի 26-ից սկսած՝ պեության կողմից գումարի տեսքով օգնություն կարող է ստանալ բնակչության առավել խոցելի խավի 255 000 ներկայացուցիչ։ Ամբողջական ծավալով ծրագրի մեկնարկից հետո օժանդակություն ստանալու համար կարող է արդեն 850 000 տնային տնտեսություն կամ 2,3 միլիոն մարդ դիմել։

Նշվում է, որ մեն անձին հասանելիք գումարի նվազագույն չափը կազմելու է 700 եվրո։ Ընտանիքի անդամների թվի աճին զուգահեռ տրամադրվելիք նպաստի չափը նույնպես մեծանալու է, սակայն գումարի առավելագույն սահմանաչափը չի գերազանցելու 1015 եվրոն։ Ծրագրի առաջին շահառուները լինելու են երեխաները:

Հայտնի է, որ Իսպանիան կորոնավիրուսից առավել շատ տուժած եվրոպական երկրներից մեկն է։ Վերջին երկու ամսվա ընթացքում մոտ 100 հազար իսպանական ձեռնարկություն հայտնել է սնանկության մասին: Նշվում է, որ ամենավատ սցենարի դեպքում երկրի ՀՆԱ-ն 2020 թվականին կարող է նվազել 15 տոկոսով։

Հայտնի է, որ համավարակի ավարտից հետո էլ ծրագրի իրականացումը շարունակվելու է։