Իրականում եղավ պատասխանի իմիտացիա

Գագիկ Ծառուկյանի ելույթը, երկրի իրավիճակի վերաբերյալ տրված գնահատականները եւ իրավիճակից դուրս գալու ուղիների մատնանշումը հունից հանել են իմքայլականներին եւ նրանց առաջնորդներին: Դրա վառ վկայություններից մեկը ելույթից քիչ անց վարչապետի խոսնակ Մանե Գեւորգյանի սպառնալիքներով լեցուն ֆեյսբուքյան գրառումն էր: Պատահական չէ, որ այս գրառումից հետո շատերը, այդ թվում եւ ԲՀԿ-ական պատգամավորները ենթադրեցին, որ հրապարակման հեղինակը բոլորովին էլ Մանեն չէ: Ձեռագիրը գռեհիկ կերպով մատնում է հեղինակին՝ քրեական գործեր, խլել եւ այլն։

Ասել, թե անսպասելի էր, որ Գագիկ Ծառուկյանի ելույթին կհետեւեր արձագանք՝ իհարկե, այդպես չէ։ Բոլորովին հակառակը, սպասելի էin շատ ավելի ուժեղ եւ շատ ավելի գրագետ պատասխաններ, գուցե՝ հակահարված։

Իրականում եղավ շատ թույլ, մեկ հոգու հրահանգով՝ մի խումբ իմքայլականների եւ ցուցափեղկին մնացած ՀԱԿ-ականների ռեակցիա։ Շատ անհամոզիչ։

Հիմա սոցցանցերում փորձ է արվում իմիտացիա ստեղծել, թե հանրությունը պատասխանում է Գագիկ Ծառուկյանին եւ վրդովված է, բայց իրականում սա միայն եւ միայն իմիտացիա է: Մեզ հայտնի մի մարդ, կրկին բուն բան ու գործը թողած ֆեյսբուքից դուրս չի գալիս եւ տարատեսակ հակածառուկյանական եւ հակաԲՀԿ-ական ստատուսներ է գրում, որոնք տարածում են իմքայլականները եւ նրանց արբանյակները, ինչպես նաեւ վերջին շրջանում բուծված ֆեյքերի բանակը:

Հանրությունն իրականում միայն քննարկում է Գագիկ Ծառուկյանի ելույթը եւ նրա դեմ արտահայտվելու որեւէ մտադրություն չունի: Հանրությունն այսօր հումանիտար աղետի մեջ է եւ հույսի դուռ է ուզում տեսնել։

Դժվար է Գագիկ Ծառուկյանի դեմ գրագետ արշավ իրականացնել։ Փաստարկները թույլ են, իսկ իրականությունը, որում այսօր հայտնվել է պետությունը՝ ողբերգական։

Լայն հանրությունը շատ լավ հասկանում է ում մեղքով է. 

ա. Հայաստանը տապալել հակակորոնավիրուսային պայքարը եւ հայտնվել այս ցուցանիշով ամենավերջին տեղերից մեկում, եթե ոչ ամենավերջում

բ. Հիվանդանոցները չեն բավարարում խիստ բուժօգնության կարիք ունեցողներին

գ. ՀՀ քաղաքացին չի կարողանում կորոնավիրուսային թեստ հանձնել

դ. Հայաստանի տնտեսությունը քարուքանդ եղել

ե. Դադարել օտարերկրյա ներդրումները

զ. Երկրում առաջացել ատելության վտանգավոր մթնոլորտ

է. Պատվերով հարուցվում քրեական գործեր եւ հետապնդվում քաղաքական մրցակիցները

ը. Ձախողվել Հայաստանի արտաքին քաղաքականությունը

թ. Երկրի թիվ մեկ պաշտոնյան ժամեր շարունակ զվաղված ֆեյսբուքյան գրառումներով եւ ոչինչ չտվող լայվերով

ժ. Նշանակվում հանրաքվե օրենքների կոպտագույն խախտումներով, իսկ հետո այն չեղարկվում Սահմանադրության ամենակոպիտ խախտումով:

Թվարկումը կարող ենք շարունակել եւ մեր այբուբենի տառերն էլ կարող է չհերիքեն եւ մենք եւս անցնենք a b c–ին, բայց հիմա բավարարվենք այսքանով եւ ՔՊ-ականներին հորդորենք վերադառնալ իրականություն: Դուք մսխեցիք հանրային վստահության ահռելի ռեսուրսը, այն դրական եւ բարձր նպատակների, երկրի զարգացմանը եւ առաջընթացին նպաստելու փոխարեն փորձեցիք օգտագործել նեղ անձնական հաշվեհարդարներ տեսնելու, քաղաքական հակառակորդներին ոչնչացնելու, բացարձակ իշխանության հասնելու համար: Փորձեցիք եւ տապալվեցիք: Հիմա երկրի տնտեսությունը քանդվել է, իսկ վարակը խժռում է մարդկանց առողջությունը եւ կյանքը։ Գագիկ Ծառուկյանն այստեղ որեւէ մեղք չունի։

Գեղամ Նազարյան

Top-News.am