Շվեդիան վերջին յոթ օրվա ընթացքում մեկ շնչի հաշվով կորոնավիրուսից մահացության ամենաբարձր ցուցանիշն ունի աշխարհում

Շվեդիան արգելափակումների ամբողջական չեղարկումից հետո վերջին յոթ օրվա ընթացքում մեկ շնչի հաշվով կորոնավիրուսից մահացության ամենաբարձր ցուցանիշն ունի աշխարհում, գրում է Daily Mail-ը։

Շվեդիայում մայիսի 13-20-ն ընկած ժամանակահատվածում մեկ միլիոն բնակչի հաշվով արձանագրվել է 6,08 մահ: Երկրում սահմանափակումների չեղարկումից հետո կտրուկ ավելացել է կորոնավիրուսի դեպքերի և մահացությունների թիվը։

Հաղորդվում է, որ մի շարք երկրների համեմատ, օրինակ՝ Միացյալ Թագավորություն (5,57), Բելգիա (4,28), ԱՄՆ (4,11), Իտալիա (2,97), Իսպանիա (2,62) և Ֆրանսիա (2,26), Շվեդիան աշխարհում մեկ շնչի հաշվով կորոնավիրուսից մահացության ամենաբարձր ցուցանիշն ունի:

Շվեդիայի կորոնավիրուսի դեմ պայքարի ռազմավարությունը, որը հիմնականում հիմնված է սոցիալական հեռավորության և տարրական հիգիենայի վերաբերյալ կամավոր միջոցառումների վրա, շատերի կողմից քննադատության է արժանացել։

Սակայն երկրի իշխանությունների որդեգրած ռազմավարությունը, կարծես, մեղմել է տնտեսության հարվածը․ հիմնվելով այսպես կոչված «պատասխանատվության սկզբունքի» վրա՝ Շվեդիան այս ընթացքում չի փակել մինչև 16 տարեկան երեխաների համար դպրոցները, ինչպես նաև սրճարանները, բարերը, ռեստորանները և ձեռնարկությունները։