Բայդենը Պորոշենկոյին 1 միլիարդ դոլար է առաջարկել Ուկրաինայի գլխավոր դատախազի պաշտոնից ազատման համար․ հրապարակվել է աուդիոձայնագրությունը (ձայնագրություն)

Ուկրաինայի Գերագույն ռադայի պատգամավոր Անդրեյ Դերկաչն աուդիոձայնագրություն է հրապարակել, որում, ինչպես նշվում է, ԱՄՆ նախկին փոխնախագահ Ջո Բայդենն Ուկրաինայի նախկին առաջնորդ Պյոտր Պորոշենկոյին մեկ միլիարդ դոլար է առաջարկում երկրի գլխավոր դատախազ Վիկտոր Շոկինի աշխատանքից հեռացման համար, որը Burisma նավթագազային ընկերության ապօրինի գործունեությունն է քննել, որտեղ էլ Բայդենի որդին է աշխատել, հայտնում է «112 Ուկրաինան»։

Դերկաչի խոսքով՝ սկզբում 2015 թվականի դեկտեմբերին Պորոշենկոյի հետ ԱՄՆ նախկին պետքարտուղար Ջոն Քերին է զրույց ունեցել։ Աուդիոձայնագրության համաձայն՝ Պետդեպարտամենտի ղեկավարն Ուկրաինայի առաջնորդին առաջարկել է դիտարկել Շոկինի «փոխարինման հնարավորությունը», որն «արգելափակել է գլխավոր դատախազությունում անցկացվող բարեփոխումները»։ Քերին նշել է, որ այդ խնդրով «անհանգստացած է» Բայդենը։

Բացի այդ, Դերկաչը հրապարակել է Բայդենի ու Պորոշենկոյի միջև ենթադրյալ խոսակցության ձայնագրությունը, որը, ըստ նրա, տեղի է ունեցել 2016 թվականի մարտին:

«Եթե նոր կառավարություն ու նոր գլխավոր դատախազ ունենաք, ես 1 միլիարդ դոլարի պարտավորությունների մասին փաստաթուղթ կստորագրեմ»,- հայտարարել է Բայդենն Ուկրաինայի առաջնորդին։

Պորոշենկոն, իր հերթին, այդ ամենը «չափազանց մեծ մոտիվացիա» է որակել և հայտարարել է, որ գլխավոր դատախազի պաշտոնը զբաղեցնելու համար դիտարկում է Յուրի Լուցենկոյի թեկնածությունը։ «Եթե կարծում եք, որ քաղաքական դրդապատճառներ ունեցող անձը այս պաշտոնին այնքան էլ չի համապատասխանում, ապա կարող եմ հետ վերցնել առաջարկս։ Որևէ մեկը տեղյակ չէ, թե ինչ եմ առաջարկելու Լուցենկոյին»,- հավելել է Ուկրաինայի նախկին նախագահի ձայնով մարդը։