«Սկսում ենք զարգացնել տուրիզմը երկրի մարզերում». Վրաստանի վարչապետ

Վրաստանի վարչապետ Գիորգի Գախարիան հայտարարել է, որ պետությունը զբոսաշրջության զարգացման գործում շեշտը պետք է դնի մարզերի, այլ ոչ թե մայրաքաղաք Թբիլիսիի վրա: Այս մասին տեղեկացնում է pia.ge կայքը:

«Մենք պետք է մի բան հիշենք. մենք դեռևս հայտնի չէ, թե որքան ժամանակ ենք ապրելու այս վիրուսի հետ, հնարավոր է՝ մի քանի ամիս կամ տարի: Մենք պետք է պատրաստ լինենք ամենավատ սցենարին և պետք է հասկանանք, որ հարկավոր է ամրապնդել մեր առավելությունը որպես զբոսաշրջային երկիր»,-ասել է Գախարիան մայիսի 19-ին Կախեթի մարզ կատարած այցելության ժամանակ:

Վրաստանի վարչապետի խոսքով՝ երկիրն այս տարի չի կարողանա նույն քանակի զբոսաշրջիկ ընդունել, որքան նախորդ տարիներին:

«Մենք բոլորս էլ պետք է հաշտվենք այն փաստի հետ, որ չենք կարող նույն քանակությամբ զբոսաշրջիկ ընդունել, որքան անցյալ տարի, բայց մենք պետք է ավելացնենք մեր մրցակցային առավելությունները, ինչպիսիք են մեր պատմությունը, գինեգործության 8000-ամյա պատմությունը, պատմական հուշարձանները, խոհանոցը, մշակույթը, հյուրընկալությունը: Առաջին հերթին, մենք պետք է զարգացնենք տուրիզմը մարզերում, այլ ոչ թե Թբիլիսիում: Կան ռիսկեր, որոնց հսկողությունը Թբիլիսիում ավելի դժվար է, դա ավելի հեշտ է անել Կախեթիում և այլ մարզերում»,-հայտարարել է Գախարիան:

Վարչապետը նշել է, որ Վրաստանը կորոնավիրուսի դեմ արդյունավետ պայքարող երկրի համբավ է ձեռք բերել, որը պետք է պահպանել և վտանգի չենթարկել Վրաստանը, հակառակ դեպքում զբոսաշրջիկները չեն այցելի: