«Դրա ընդունման օգուտը գերազանցում է հնարավոր ռիսկերը»․ Թրամփի բժիշկը պատմել է՝ ինչ դեղամիջոցով է նախագահը «պաշտպանվում» կորոնավիրուսից

ԱՄՆ նախագահ Դոնալդ Թրամփի անձնական բժիշկ Շոն Քոնլին նամակի միջոցով հայտնել է, որ նախագահը կորոնավիրուսային համավարակի ֆոնին ընդունում է մալարիայի բուժման համար նախատեսված դեղամիջոց՝ հիդրոքսիքլորոխին, որի ընդունման օգուտն ավելի շատ է, քան հնարավոր ռիսկերը: Այս մասին ասված է Քոնլիի ստորագրությամբ նամակի պատճեում, որը հրապարակել է Սպիտակ տունը, գրում է ria.ru-ն։

«Ինչպես ավելի վաղ հաղորդվել էր, նախագահի վարչակազմի աշխատակիցներից մեկի մոտ COVID-19 է ախտորոշվել։ Մի շարք քննարկումներից հետո նա և ես, հենվելով հիդրոքսիքլորոխինի դրական և բացասական տվյալների վրա, որոշեցինք, որ դրա ընդունման հնարավոր օգուտը գերազանցում է հնարավոր ռիսկերը»,- ասված է Քոնլիի նամակում:

Թրամփն ավելի վաղ հայտարարել էր, որ վերջին շրջանում օրական ընդունում է հիդրոքսիքլորոխինի հաբ, որի օգտագործումը նա ավելի վաղ գովազդել էր որպես կորոնավիրուսի դեմ դեղամիջոց և որի արդյունավետությունը դեռևս ապացուցված չէ:

«Դուք կզարմանաք՝ իմանալով, թե քանի մարդ է ընդունում այն։ Առաջնագծում աշխատողները, շատ շատերը ընդունում են այդ դեղամիջոցը։ Ես էլ եմ ընդունում։ Այո, այս պահին, ընդունում եմ։ Մի քանի շաբաթ առաջ սկսեցի ընդունել, քանի որ կարծում եմ, որ այն լավ ազդեցույթուն է ունենում։ Շատ լավ արձագանքներ եմ լսել, ուստի՝ ամեն օր մեկ հաբ ընդունում եմ»,- ասել է Թրամփը։