«Վանաձոր-Քիմպրոմ»-ի ՋԷԿ-ի նախկին աշխատակիցներն արգելափակել են գործարանի դարպասները
«Վանաձոր-Քիմպրոմ»-ի ջերմաէլեկտրակայանի նախկին աշխատակիցներն արդեն չորրորդ օրն է շուրջօրյա հերթապահություն են իրականացնում գործարանի մուտքերի մոտ՝ թույլ չտալով որևէ բեռնատար մեքենայի մտնել գործարանի տարածք ու այնտեղից որևէ գույք հանել:
Վեց տարի ի վեր աշխատակիցները պայքարում են իրենց 2011-2012 թվականների մի քանի ամիսների աշխատավարձը ստանալու համար: Գործարանը 153 աշխատողների 130 միլիոն դրամ է պարտք:
«Մենք մինչև վերջ պըտի գնանք: Թող իրանք իմանան, որ ստի ո՛չ մեքենա ա մտնելու, ո՛չ դուրս ա գալու․․․ Պարապուրդ չի էղել, որ ասենք ինչ-որ․․․ մարդիկ գիշեր-ցերեկ աշխատել են, որ էներգիա ստանան ածուխից: Վարկավորված ա էղել, պետությունը վարկը տվել ա, որ էդ փողը օգտագործվի աշխատավարձի նպատակով: Բայց չի օգտագործվել, մարդիկ գրպանել են», - ասաց բողոքավորներից մեկը:
«Ես իրանցից հո ողորմություն չեմ խնդրում, էդ իրանք են ինձանից ողորմություն խնդրում, ու իմ փողերովն են իրանց էսօր իրանց ընտանիքները պահում: Բայց ես ուզում եմ հետ ստանամ իմ փողերը, որ ես էլ իմ ընտանիքը պահեմ», - հավելեց մեկ ուրիշը:
Վեց տարիների ընթացքում ՋԷԿ-ի աշխատակիցները դիմել են մարզային իշխանություններին, վերջին երեք վարչապետերին, նախագահին: Ուշագրավ է, որ իշխանության ներկայացուցիչները հաճախ խորհուրդ են տվել բողոքի ցույց անող քիմպրոմցիներին դիմել դատարան և այդ ճանապարհով լուծել իրենց խնդիրը:
ՋԷԿ-ի աշխատակիցները դեռ 2012-ին դիմել էին դատարան, 2014-ին դատը շահել էին, բայց մինչև օրս նրանցից ոչ մեկի աշխատավարձը դեռ չի վճարվել:
Դատարանը սնանկ էր ճանաչել 2011 թվականին ՋԷԿ-ի սեփականատեր «Ռեգիոն Էներջի» ընկերությանը՝ պարտավորեցնելով գույքի վաճառքից ստացվելիք միջոցներից վճարել շուրջ 130 միլիոն դրամի աշխատավարձի պարտքը: Ավելի ուշ, սակայն, պարզվել էր, որ ընկերությունը գույք չունի:
Նախատեսվում էր, որ «Ռեգիոն Էներջի»-ի սնանկացումից հետո աշխատողների պարտքը վճարելու է իրավահաջորդ «Վանաձոր-Քիմպրոմ»-ը, սակայն անցած տարի սնանկ ճանաչվեց նաև այս ընկերությունը:
Սնանկացած «Վանաձոր-Քիմպրոմ»-ը բազմաթիվ պարտքեր ունի կուտակած, իսկ պարտատերերի ցուցակում աշխատավարձի պարտքը ամենևին էլ առաջնահերթ չէ:
ՋԷԿ-ի նախկին աշխատողները թերահավատ են, թե մոտ ժամանակներում իրենց հերթը կհասնի․ - «Էդ հերթը կարա մի 40-50 տարի գնա․․․ Այսինքն էդ փողերը կմնա իրանց, տենց են պատկերացնում»:
Երկու ամիս առաջ աշխատակիցների հետ հանդիպման ժամանակ «Վանաձոր-Քիմպրոմ»-ի սնանկության գործով կառավարիչ Կարեն Ասատրյանը հորդորում էր աշխատակիցներին օրինական ճանապարհով իրենց խնդիրը լուծել՝ դիմում գրել, որպեսզի պարտատերերի ցուցակում իրենց առաջնահերթություն տրվի: Դրական տեղաշարժ դեռևս չկա: Ցուցարարները մտադիր են շարունակել հերթապահությունը այնքան ժամանակ, մինչև իրենց աշխատավարձի խնդիրը վերջնականապես չլուծվի:
Եվրամիությունը չի հասկանում Իրանում պատերազմի նպատակները. Կալաս
Լարիջանիի սպանությունից հետո Իրանը կասետային ռումբերով հարվածել է Թել Ավիվին
Օրինազանց վարորդները հայտնաբերվել են, մեքենաները՝ տեղափոխվել պահպանվող հատուկ տարածք
Ռոմանոս Պետրոսյանը լուսանկարներ է հրապարակել ՀԷՑ-ի բաշխման ցանցի տրանսֆորմատորային ենթակայաններից
Մարմնամարզության տղամարդկանց հավաքականը տուն է վերադառնում
Ղարաբաղից տեղահանվածները պետք է կապեն իրենց ապագան Հայաստանի հետ
Պետական արգելոցի ֆոտոթակարդները կրկին նկարահանել են կովկասյան ընձառյուծին
Գվարդիոլան արդեն այնքան հանդիպումներ է անցկացրել, որ ես չեմ համարձակվի նրան խորհուրդներ տալ
Լոնդոնից գնված հայկական եկեղեցու փեղկն ու Արշիլ Գորկու գրաֆիկական աշխատանքն առաջիկա օրերին կցուցադրվ...
Արսեն Զախարյանի տրանսֆերային արժեքն աճել է