Իրանը միջուկային համաձայնագրի ղեկավարներին նախազգուշացրել է զենքի արգելքի վերականգնման դեպքում «շատ լուրջ հետևանքների» մասին

Իրանի նախագահ Հասան Ռոհանին նամակ է գրել 2015 թվականի կնքված միջուկային համաձայնագրի անդամ երկրների (Ռուսաստան, Չինաստան, Ֆրանսիա, Գերմանիա, Մեծ Բրիտանիա) առաջնորդներին՝ տեղեկացնելով՝ ինչպիսին կլինի Թեհրանի պատասխանը Իրանի նկատմամբ զենքի արգելք կիրառելու դեպքում: Այս մասին տեղեկացնում է «ՌԻԱ Նովոստի» գործակալությունը:

«Եթե երբևէ ցանկանան, որ Իրանի դեմ զենքի արգելքը ցանկացած պատրվակով կամ մեխանիզմով վերականգնվի, ապա մենք կպատասխանենք այնպես, ինչպես ես գրել եմ «4+1» խմբի պետությունների առաջնորդներին ուղղված իմ նամակի վերջին կետում: Նրանք լավ գիտեն պատասխանի մասին»,-հայտարարել է Ռոհանին կառավարության նիստի ընթացքում:

Նրա խոսքով՝ Իրանի արձագանքը շատ լուրջ հետևանքներ կունենա:

Իրանի նախագահը հայտարարել է նաև, որ միջուկային համաձայնագրից ԱՄՆ-ի դուրս գալը «հիմար սխալ էր» և Վաշինգտոնում այդ մասին հասկացել են այն ժամանակ, երբ Իրանի նկատմամբ զենքի արգելքը հանելուն շատ քիչ ժամանակ էր մնացել:

«Ամերիկացիները միայն երկու ամիս է, ինչ զարթնել են իրենց անհոգ քնից, հասկացել են, թե ինչ խոշոր սխալ են գործել միջուկային համաձայնագրից դուրս գալով: Նրանք ճանապարհ չունեն ոչ դեպի առաջ, ոչ դեպի ետ»,-նշել է Ռոհանին:

Նրա խոսքով՝ Վաշինգտոնը կարող է կրկին դիմել համաձայնագրին անդամակցելու համար, որը նախևառաջ պիտի ընդունվի, իսկ ԱՄՆ-ն պետք է փոխհատուցի Իրանին այն վնասը, որը հասցվել է պատժամիջոցների միջոցով:

Ավելի վաղ Ռուսաստանի փոխարտգործնախարար Սերգեյ Ռյաբկովը հայտնել էր, որ Իրանին զենք և ռազմական տեխնիկա մատակարարելու գործող հատուկ ռեժիմըհնգամյա ժամկետից հետո լրանալու է, և այդ որոշումից որևէ շեղում չի կարող լինել: ԱՄՆ պետքարտուղար Մայք Պոմպեոն էլ իր հերթին հայտնել է, որ ԱՄՆ-ն ամեն ինչ անելու է Իրանի նկատմամբ զենքի արգելքը երկարաձգելու համար, որպեսզի թույլ չտա այդ երկրին զենք ձեռք բերել Ռուսաստանից կամ Չինաստանից:

Իրանն ու «միջնորդ վեցյակը» 2015 թվականի հուլիսին պատմական համաձայնության էին եկել Թեհրանի միջուկային ծրագրի երկարատև խնդրի շուրջ: Բանակցությունների արդյունքում ընդունվել էր միասնական գործողությունների համապարփակ ծրագիր, որը ենթադրում էր ՄԱԿ-ի Անվտանգության խորհրդի, ԱՄՆ-ի և ԵՄ-ի կողմից Իրանի նկատմամբ պատժամիջոցների վերացում: Ծրագրի համաձայն՝ Իրանի նկատմամբ զենքի ներկրման արգելքը պետք է չեղարկվեր 5 տարվա ընթացքում, մինչ այդ էլ զենքի մատակարարումը թույլ է տրվում միայն ՄԱԿ-ի Անվտանգության խորհրդի հավանությամբ: Համաձայնագրի գործունեությունը 3 տարի էլ չի տևել. 2018 թվականի մայիսին ԱՄՆ-ն հայտարարել է համաձայնագրից միակողմանի ելքի և Թեհրանի նկատմամբ կոշտ պատժամիջոցների վերականգնման մասին: