Կոնտեն բացատրել է, թե ինչու է ճանկել եւ հրել իր օգնականին (Տեսանյութ)

Լոնդոնի «Չելսիի» իտալացի գլխավոր մարզիչ Անտոնիո Կոնտեն բացատրել է, թե ինչու է «Արսենալի» դեմ Անգլիայի առաջնության 24-րդ տուրի հանդիպման ժամանակ հրել իր օգնական Անջելո Ալեսիոյին:

«Նա միշտ ձեռքիս տակ է ընկնում: Անկյունայինի իրացման ժամանակ ես պետք է փոխեի խաղացողների դիրքերը, քանի որ երկրորդ անկյունայինի ժամանակ «Արսենալն» առաջ էր ուղարկել վեց խաղացողների եւ նրանցից մեկին մենք բաց թողեցինք տուգանային հրապարկի մոտ: Դա շատ վտանգավոր էր: Ես փորձում էի այդ մասին բղավել մեր խաղացողներին եւ օգնականիս հրահանգեցի միտքս փոխանցել ֆուտբոլիստներին: Մեզ չհաջողվեց դա անել եւ կարող էինք գոլ բաց թողնել: Անջելոն գերազանց է ինձ ճանաչում եւ գիտի, թե ինչքան հուզական կարող եմ լինել այդպիսի պահերի: Կարեւոր է, որ կենտրոնացումը չկորցնեն նաեւ մարզիչները, քանի որ մենք հաղթում եւ պարտվում ենք միասին»,- Կոնտեի խոսքը մեջբերում է «Չելսիի» կայքը:

Հիշեցնենք, որ «Չելսին» այդ խաղում «Արսենալին» հաղթել է 3:1 հաշվով եւ գլխավորում է մրցաշարային աղյուսակը:

sport.news.am