Վրաստանի խորհրդարանը կողմ է քվեարկել մինչեւ մայիսի 22-ը արտակարգ դրությունը երկարաձգելուն

Վրաստանի խորհրդարանը համաձայնել է մինչեւ մայիսի 22-ը արտակարգ դրությունը երկարաձգել։ Արտակարգ դրության երկարաձգմանը այսօրվա արտահերթ լիագումար նիստում կողմ է քվեարկել 97 պատգամավոր, դեմ՝ 10, հայտնում է «Նովոստի-Գրուզիա»-ն։

Նոր կորոնավիրուսի համավարակի հետ կապված՝ մարտի 21-ին Վրաստանում մինչեւ ապրիլի 21-ը մեկ ամսով արտակարգ դրություն է հայտարարվել։ Երեկ կառավարությունը դիմել է նախագահին՝ խնդրելով մինչեւ մայիսի 22-ը երկարաձգել արտակարգ դրությունը։ Նախագահ Սալոմե Զուրաբիշվիլին ստորագրել է փաստաթուղթը եւ համապատասխան հրահանգ տվել։

Այսօր ելույթ ունենալով խորհրդարանում՝ Զուրաբիշվիլին ցավակցություն է հայտնել կորոնավիրուսից մահացածների ընտանիքներին։

Վրաստանում գրանցվել է կորոնավիրուսից մահվան հինգ դեպք։ Բոլոր մահացածները 65-ից բարձր տարիք եւ հարակից քրոնիկ հիվանդություններ են ունեցել։

Իր ելույթում նախագահը նաեւ շնորհակալություն է հայտնել բուժաշխատողներին։