Երկրային կյանքին հրաժեշտ է տվել գրոսմայստեր Արսեն Եղիազարյանը

Երկրային կյանքի 49-րդ տարում հանկարծամահ է եղել գրոսմայստեր, ճանաչված մարզիչ Արսեն Եղիազարյանը:

Տաղանդավոր գրոսմայստերը մարզել է այժմ ճանաչված շատ ու շատ հայ շախմատիստների, եղել է կանանց հավաքականի մարզիչը:

Վերջին շրջանում աշխատում էր Ղազախստանում, մարզում տեղի շախմատիստներին:

Հայաստանի հավաքականի կազմում Արսեն Եղիազարյանը մասնակցել է 1994 եւ 1996 թվականների Համաշխարհային օլիմպիադաներին: Արսեն Եղիազարյանը լինելով գրոսմայստեր, լավ մարզիչ, միաժամանակ չափազանց համեստ եւ պարկեշտ անձնավորություն էր:

Top-News.am-ը ցավակցում է գրոսմայստերի ընտանիքի անդամներին, հարազատներին, ընկերներին եւ նրա բազմաքթիվ աշակերտներին:

Արսեն Եղիազարյանի մահվան կապակցությամբ Ղազախստանում գործող Ժանսայա Աբդուլմալիքի շախմատի ակադեմիան գրել է. 

«Մի մարդու կյանքը մի ամբողջ պատմություն է՝ լեցուն տարբեր իրադարձություններով եւ պահերով: Մենք ամեն օր ծրագրեր ենք կազմում, մեր առջեւ մեծ խնդիրներ դնելով, բայց կյանքը կարող է իր ծրագրերն ունենալ...

Մենք երբեք պատրաստ չենք լինի բաց թողնել մեզ հարազատ մարդկանց...

Այսօր մենք ստիպված ենք դեպի հավերժություն բաց թողնել շախմատային մեր հսկա կոլեկտիվի անդամին՝ Արսեն Արտաշի Եղիազարյանին: Ոչ մի խոսք չի կարող արտահայտել այն ցավը, որ մենք հիմա ապրում ենք: 

Մենք կորցրինք տաղանդավոր շախմատիստի, իր գործի մասնագետին, իմաստուն մարզչի եւ բարի մի անձնավորության: Նա շատ էր սիրում իր գործը, հոգատար էր յուրաքանչյուր աշակերտի նկատմամբ, ոգեւորում էր նրանց եւ հավատում հաջողություններին:

... Մեր սրտերում այս հրաշալի մարդը կմնա հավերժ»:
⠀